Tələbələr Marneuli-Qırmızı Körpü istiqamətində hərəkət edən avtobusun vaxtı-vaxtında işləməməsindən şikayətlənirlər.

Səidə Abdullayeva bacısı ilə birlikdə Tbilisidə təhsil alır. Onlar ailəsini görmək üçün kəndə gəldikləri zaman çətinliklərlə qarşılaşırlar. Abdullayeva Kirəç Muğanlı kəndində yaşayır, o, hər dəfə Tbilisidən Marneuliyə, Marneulidən də kəndə getməli olur.

Səidənin sözlərinə görə, hər dəfə kəndə gəlmək istədiyində ictimai nəqliyyat tapmır və yolda qalmamaq üçün qonşu kəndlərin ictimai nəqliyyatından istifadə edir. Bu isə Səidə üçün vaxt itkisi olur, eyni zamanda yol xərclərini də artırır.

“Son zamanlar nəqliyyat qaydasında işləmir. Marneulidən Qırmızı Körpüyə avtobuslar 10-da, 12-də, 2-də və 4-ün yarısı çıxırlar. Son bir- iki həftədir ki, öz vaxtlarında hərəkət etmirlər. Bizim dərslərimiz 1-də bəzən də 3-də bitir. Tbilisidən Marneuliyə gedirik, ancaq 4-ün yarısında çıxana çata bilirik. Amma o da işləmir. Deyirlər ki, 4-ün yarısı gəlmirsə, 6-nı gözləyin. Gözləyirik, o da gəlmir. Bu halda isə məcbur olub Qaçağan marşrutuna minirik. O da Qaçağana qədər gəlir. 7-in yarısı Qaçağanda oluruq. Ya atam, ya da qohumlardan kimsə gəlir, bizi evə aparır”.

Səidə deyir ki, hər dəfə başqa kəndlərin nəqliyyatından istifadə etmək onun yol xərclərinin artmasına gətirib çıxarır. Onun sözlərinə görə, yol xərclərinin artması tələbə üçün çətin haldır.

“Başqa bir kənddə düşməyimiz narahatçılıqdır. Qaçağan marşrutunu tapa bilməyəndə isə İkinci Kosalı marşrutuna minirik. Əgər onu da tapmasaq, məcbur qalıb taksi tuturuq. Qaçağan marşrutu ilə 2.50 lariyə gəlirik. Taksi ilə bir nəfər 5 lariyə. Öz marşrutumuzla gəlsək, cəmi 2 larimiz çıxır. Onlar işləmədiyinə görə hər dəfə yola 7-10 lari pulumuz çıxır”.

Səidə bildirir ki, onun kimi Tbilisidə qalıb, kəndə gəlmək istəyən tələbələrin hamısı eyni çətinliklə qarşılaşırlar.