Tetritskaro rayonunun Kosalar kəndi bələdiyyə mərkəzindən uzaqda yerləşir. Kənddə içməli su və qaz var, bəzi daxili yollar asfaltlanıb, lakin əhali hələ də infrastruktur və sosial problemlərdən əziyyət çəkir.

Kosalar kəndinin sakinləri kənddəki həyat şəraiti barədə fikirlərini bizimlə bölüşüblər – kənddə uşaq bağçası yoxdur, bəzi torpaq yollar hələ də bərbad vəziyyətdədir, təbii zibilliklər mövcuddur, ictimai nəqliyyat təmin olunmayıb, otlaq sahələri və suvarma suyu çatışmır.

“Kəndimizdə mikroavtobus yoxdur. Bu gün getməli idim, amma gedə bilmədim. Piyada yola çıxıram, Tsisğaridə mikroavtobusa minirəm, kartım var, 1 lari ödəyib ora gedirəm. Geri isə taksi ilə qayıdıram – 20 lariyə. Bu istidə Marneulidə dayanmaq mümkün deyil”, – Tərlan Qocayeva deyir.

“İndi demək olar ki, hamının maşını var. Maşını olmayanlara isə çətindir. Yola çıxırıq, gedən olarsa, maşınla aparırlar. Ancaq daimi nəqliyyat yoxdur. Tsisğari-Tetritskaro mikroavtobusu Marneulidən gəlir. Amma Kosalar-Marneuli və ya Kosalar-Tetritskaro istiqamətində mikroavtobus yoxdur. Bu baxımdan maşını olmayan üçün vəziyyət ağırdır”, – Turqut Özal Qocayev bildirir.

Kosalar kəndində uşaq bağçası fəaliyyət göstərmir. Əhali hesab edir ki, kənddə bağçanın olması həm uşaqlar üçün təhsil baxımından, həm də valideynlərin işləməsi üçün şərait baxımından faydalı olardı.

“Bizim kənddə bağça yoxdur. Qonşu kənddə var, uşaqları mikroavtobusla ora aparırlar. Bizim kənddə də olsa, çox yaxşı olardı”, – kənd sakini bildirir.

Kosalar sakini Tərlan Qocayeva kənddə evinin yaxınlığında yerləşən zibillikdən narahatdır. O, deyir ki, bu səbəbdən nəfəs almaqda çətinlik çəkir.

“Burada qala bilmirəm. Hava yoxdur, pis qoxu gəlir. Xəstəyəm, yaşlı adamam. Qonşumda nə vaxta qədər qala bilərəm? Səhər-axşam arabalarla zibil gətirirlər. Burnumu əlimlə tuturam. Boğuluram, həyətimdə otura bilmirəm”, – Qocayeva bildirir.


“Marneuli” radiosu Kosalar kəndində uşaq bağçasının tikilib-tikilməyəcəyini, ictimai nəqliyyatın təyin olunub-olunmayacağını və təbii zibilliklərlə bağlı planlarını öyrənmək üçün Tetritskaro meriyası ilə əlaqə saxlaydı. Meriya müraciətimizə yazılı şəkildə cavab verdi. Rəsmi məktubda bildirilir ki, Kosalar kəndində uşaq bağçasının tikintisi nəzərdə tutulmur.

“Kosalar kəndində uşaq bağçasının tikintisi planlaşdırılmır, çünki gürcü və azərbaycanlı uşaqların inteqrasiyası məqsədilə əhali ilə razılaşdırılaraq Tsintskaro kəndində 175 yerlik yeni tikilmiş uşaq bağçası onlara xidmət göstərir”, – deyə Tetritskaro meriyasının cavabında qeyd olunur.

Meriyadan onu da qeyd edirlər ki, “Tetritskaro Məktəbəqədər Təhsil və Aztəminatlılara Dəstək Mərkəzi” uşaqların Kosalardan Tsintskaroya daşınmasını təmin edəcək.
Rəsmi məktubda qeyd olunur ki, Tbilisi və Marneuli istiqamətlərində ictimai nəqliyyatın təyin olunması planlaşdırılır, lakin dəqiq tarix göstərilməyib.

“İctimai nəqliyyatla bağlı olaraq, meriya yaxın zamanda “JAC” tipli mikroavtobuslar almağı planlaşdırır. Bundan sonra Kosalar kəndinin sakinləri Tbilisi və Marneuli istiqamətində bələdiyyə nəqliyyatından istifadə edə biləcəklər”, – deyə məktubda qeyd edilir.

Kənddəki qeyri-qanuni zibilliklərin təmizlənməsi planı ilə bağlı suala Tetritskaro meriyası belə cavab verir: “Bizdə belə zibilliklər yoxdur.”