Gürcüstanın Birləşmiş Su Təchizatı Şirkəti Bolnisi, Marneuli və Tetritskaro bələdiyyələrində

su və kanalizasiya sistemlərinin tikinti və yenidənqurma işləri nəticəsində zədələnmiş yol örtüyünün bərpası ilə bağlı xidmətlərin satın alınması üçün tender elan edib.

Tenderin ümumi dəyəri 96 000 lari təşkil edir və Kvemo Kartli bölgəsinin üç bələdiyyəsində yol infrastrukturunun bərpasını nəzərdə tutur.

Sənədlərə əsasən, podratçı yol örtüyünün mövcud vəziyyətini yerində qiymətləndirməli və müvafiq olaraq bərpa işlərini həyata keçirməlidir. Bura bütün zəruri və əlaqəli proseslər daxildir. Yeni salınan örtük əvvəlki səviyyəyə uyğun olmalı, çökməməli və yolun profilinin pozulmaması təmin edilməlidir.

Tikinti prosesi zamanı texnoloji ardıcıllıq və keyfiyyət standartları qorunmalı, işçi heyətinin təhlükəsizliyi təmin olunmalıdır. Tender sənədlərində xüsusi olaraq vurğulanır ki, tikinti sahəsində çalışan fəhlə və mühəndis-texniki heyət müvafiq qoruyucu geyim – dəbilqə və xüsusi uniforma ilə təmin olunmalı, xüsusi işlər yalnız lazımi texniki avadanlıqla icra edilməlidir. Tikinti sahəsində təhlükəsizlik qaydalarının pozulmaması və işlərin sistemli şəkildə təşkili təmin olunmalıdır.

Tenderdə göstərilən xərclər planına əsasən, görüləcək işlərin əsas hissəsi yol çalalarının doldurulmasını nəzərdə tutur.

Marneuli və kəndlərində su təchizatı və kanalizasiya layihəsinə 2019-cu ildə start verilib. Layihə çərçivəsində yollar qazılıb, infrastruktur zədələnib, ictimai nəqliyyat vasitələrinə və şəxsi avtomobillərə ciddi ziyan dəyib. İlkin olaraq layihəni "Akelik Group" şirkəti 2021-ci ilin martına qədər tamamlamalı idi, lakin öhdəliklər yerinə yetirilmədiyindən 55.940.022 ABŞ dolları dəyərindəki layihə dayandırılıb.

Daha sonra Su Təchizatı Şirkəti yeni müqaviləni Türkiyə və Çin şirkətləri ilə bağlayıb. Tikinti işlərini hazırda "China Geo - Engineering Corporation" (CGC) və "POLAT Yol Yapı Sanayi ve Ticaret A.Ş." həyata keçirirlər.

Layihənin ümumi dəyəri 135 milyon laridən artıqdır və o, Asiya İnkişaf Bankının dəstəyi ilə maliyyələşdirilir. Layihə çərçivəsində Marneulidə yeni su təchizatı şəbəkəsi, nasos stansiyası, su anbarları, kanalizasiya sistemi və müasir standartlara uyğun təmizləyici qurğu tikilir.

Layihənin tamamlanmasından sonra Marneuli əhalisinin 24 saatlıq su təchizatı və yenilənmiş kanalizasiya infrastrukturu ilə təmin olunması nəzərdə tutulur.

 

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---