Gürcüstan Baş Prokurorluğunun yaydığı məlumata əsasən, Tbilisi Apellyasiya Məhkəməsi prokurorluğun apellyasiya şikayətini tam şəkildə qəbul edib

və Rustavi Şəhər Məhkəməsinin hökmünə dəyişiklik edib. Bacısını qətlə yetirməkdə təqsirli bilinən şəxsə Rustavi Şəhər Məhkəməsi əvvəlcə 18 il müddətinə azadlıqdan məhrumetmə cəzası təyin etmişdi. Lakin Prokurorluq bu qərarı şikayət edib və cinayətkarın ömürlük həbs cəzasına məhkum edilməsini tələb edib. Nəticədə Apellyasiya Məhkəməsi prokurorluğun tələbinə əsasən hökmə dəyişiklik edərək təqsirləndirilən şəxsə ömürlük həbs cəzası təyin edib.

Prokurorluğun açıqlamasında qeyd olunur ki, Daxili İşlər Nazirliyi tərəfindən aparılan istintaqla müəyyən edilib ki, təqsirləndirilən şəxs bacısının şəxsi həyatı ilə bağlı qərar vermək hüququnu məhdudlaşdırırmış və onun həyat yoldaşından ayrılmasını ailənin şərəfinə xələl gətirən hal kimi qiymətləndirirmiş. Bu səbəbdən, 2024-cü il mayın 16-da Qardabani şəhərində o, əvvəlcə bacısını avtomobillə vurub, sonra isə ona bıçaqla həyati təhlükəli, ağır bədən xəsarətləri yetirib. Cinayətdən sonra hadisə yerindən qaçsa da, elə həmin gün hüquq-mühafizə orqanları tərəfindən saxlanılıb. Qadın aldığı xəsarətlər nəticəsində hadisə yerində dünyasını dəyişib.

Qeyd edək ki, təqsirləndirilən şəxsə qarşı Gürcüstan Cinayət Məcəlləsinin 11 prima və 109-cu maddəsinin “e” (qəsdən, qabaqcadan düşünülmüş şəkildə, müdafiəsiz vəziyyətdə olan şəxsin öldürülməsi), “t” (gender əsaslı qəsdən adamöldürmə), “k” (ailə üzvünü qəsdən öldürmə) və “m” (xüsusi qəddarlıqla adamöldürmə) bəndləri üzrə ittiham irəli sürülüb.