Marneuli bələdiyyəsinin Qızılhacılı kənd sakinləri təxminən 5 aydır ki, içməli su olmadan yaşamağa məcbur olurlar.

Kənd sakinləri bildirirlər ki, qış fəslində içməli su fasilələrlə verilsə də, hazırda demək olar ki, ümumiyyətlə verilmir. Yerli sakin Ləmiyə Zeynalova “Marneuli” radiosuna açıqlamasında bildirdi ki, məsələ ilə bağlı kəndin deputatına zəng vuraraq vəziyyəti izah etsə də, indiyədək heç bir tədbir görülməyib.

“Bir həftədir bizə su verilmir. Sonuncu dəfə bir həftə əvvəl motoru işə saldım, çəni doldurdum. Deputatlara zəng edirəm, heç biri telefonumu açmır. Su şirkətinə zəng vururam, cavab vermirlər. Beləcə qalmışıq. İçməli suyumuz yoxdur. Qonşudan bir dəfə su ala bilirsən, ikinci dəfə utanırsan”, – deyə Ləmiyə Zeynalova bildirdi.

Kənd sakini Sevda Əsgərova isə su problemi ilə yanaşı, yeni su xətləri çəkilərkən yolların qazıldığını, bu yolların sonradan sakinlərin öz hesabına bərpa olunduğunu vurğuladı.

“Yeni su xətti çəkiblər. Gecə saat 12-də, ya da 1-də gəlir. O da çox zəif – 10 dəqiqəlik su gəlir, sonra kəsilir. Nə çəni doldurmaq olur, nə də normal istifadə etmək. Təzyiq o qədər zəifdir ki, heç bir işə yaramır. Köhnə su xəttini də açmırlar. Bu gün qoşacağıq, sabah qoşacağıq deyirlər, amma irəliləyiş yoxdur. Bu yayın istisində bu millətə bu cür zülm etmək günah deyilmi? Nəzarət etmirlər, diqqət göstərmirlər. Əgər vaxtında diqqət etsəydilər, vəziyyət bu həddə çatmazdı, camaat da narazı qalmazdı.

Su yalnız həftədə iki dəfə – bazar ertəsi və cümə günləri verilir. Yolları 5 dəfə qazıblar. Biri çəkib, sonra yenidən qazıblar. Aylarla bu vəziyyətdir. Yay gəlir deyə ümid edirdik ki, düzələr. Yumaq üçün suyu arxdan götürürük. Çən olmayanda qonşulardan daşıyırıq və ya maşınla başqa yerdən gətiririk. Su maşınları əvvəllər 60 lari idi, indi 100 lariyə qaldırıblar. Əhali ilə maraqlanmaq lazımdır, bu insanlar necə dolanır? Kəndin icra nümayəndəsi vəziyyəti bilir. Deyirlər, müvəqqəti məsələdir, düzələcək,” – deyə Sevda Əsgərova dedi.

Gürcüstan Birləşmiş Su Təchizatı Şirkətinin Kvemo Kartli regional filialının rəhbəri Kaxaber Çoqovadze “Marneuli” radiosuna verdiyi açıqlamada bildirdi ki, Qızılhacılıda içməli su probleminin səbəbi boru xətlərinin bir hissəsinin hələ tam yenilənməməsidir.

“600-lük boru xəttində müəyyən hissələr qalıb. Tikinti şirkəti bu hissələrin qoşulmasını mərhələli şəkildə həyata keçirir. Bu proses başa çatdıqdan sonra vəziyyət düzələcək. Hazırda mümkün qədər, təxminən 2 saat su veririk. Tikinti şirkəti bizə söz verib ki, gələn həftənin sonuna qədər problem aradan qalxacaq. Qızılhacılının tam su təchizatının bərpası isə avqustun ortalarına planlaşdırılır. Bu məlumat podratçı şirkət tərəfindən verilib. Yeni su şəbəkəsi o vaxta qədər işə salınacaq”, – deyə Çoqovadze bildirdi.

Marneuli və onun kəndlərinin su təchizatı və kanalizasiya layihəsinə 2019-cu ildə başlanılıb. Layihə çərçivəsində yollar qazılıb, infrastruktur köhnəlib, ictimai nəqliyyata və şəxsi avtomobillərə ziyan dəyib. Əvvəlcə “Akelik Group” şirkəti layihəni 2021-ci ilin mart ayına kimi başa çatdırmalı idi, lakin öhdəliklərini yerinə yetirə bilmədi və bu səbəbdən 55 940 022 dollar dəyərində layihə dayandırıldı.

Su təchizatı şirkəti Türkiyə və Çin şirkətləri ilə yeni müqavilə imzalayıb. İşlər "China Geo - Engineering Corporation" (CGC) və "POLAT Yol Yapı Sanayi və Ticarət Anonim Sirkei" tərəfindən həyata keçirilir.

Layihə Asiya İnkişaf Bankının dəstəyi ilə 135 milyon laridən artığa başa gələcək. Buraya yeni su təchizatı şəbəkəsinin, nasos stansiyasının, su anbarlarının, yeni kanalizasiya şəbəkəsinin və müasir standartlara cavab verən təmizləyici qurğunun tikintisi daxildir.

Layihə başa çatdıqdan sonra Marneuli əhalisi 24 saat su təchizatı və yeni kanalizasiya infrastrukturu ilə təmin edilməlidir.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---