Marneulidə mövcud olan gəlinlik mağazalarında geniş seçim imkanı var. 
Geyim mağazası əsasən, şəhərin mərkəzi küçəsində, Ş.Rustavelidə yerləşir. Toy mərasimlərinə gəlinlik kirayələmək üçün buraya bələdiyyənin bütün kəndlərindən eləcə də, qonşu bələdiyyələrdən gəlirlər. Hətta Tbilisidən də müştərilər buraya baş çəkirlər.

Toy donların qiyməti 300 laridən başlayır və 1500 lariyə qədər dəyişir. Qiymətlər əsasən donun materialına və istifadə olunan bəzək nümunələrinə görə müəyyən olunur. Salon nümayəndəsi Aybəniz İrişova bizimlə söhbəti zamanı bildirdi ki, gəlinlikləri bəzi hallarda alıb xaricə aparırlar.

“Biz donları kirayə veririk. Sifariş verib, alıb aparanda olur. Kimsə istəyir məsələn, donun qiyməti 300-500 dollardır. Deyir mənə gətir, alır aparır. Rusiyaya və ya Fransaya alıb aparırlar. Almaq çox nadir halda olur. Kirayə götürmək bizim üçün sərfəlidir. Kirayə 3-5 dəfə versən öz pulunu çıxarırsan. Azdan-çoxdan da özünə qalır”.

Onun sözlərinə görə, məhərrəmlik ayı olduğundan toylar olmur və bu səbəbdən müştərilərin də sayı azdır.

“Bu donları Türkiyədən gətiririk. Hal-hazırda məhərrəmlik ayıdır toy yoxdur, amma yazılanlar var. Don götürəndə saç-makiyaj da edir, maşın da bəzəyirik. Əgər müştəri həm don kirayələyir, həm də saç-makiyajı bizim salonda edirsə hamısı birlikdə 700-800 lariyə başa gəlir. Qiymətlər donlarda əsasən parşasına və daş-qaşların olmasına görə fərqlənir”, - Aybəniz İrişova dedi.

Mağazalarda cərgəyə düzülmüş gəlin donları arasında hicablı qadınlar üçün də gəlin donlarına rast gəlmək olar. Mağaza sahiblərinin sözlərinə görə, onların qiyməti daha bahadır, çünki onun üçün daha çox parça və resurs sərf olunur. Uyğun olaraq, bu da qiymətin artımı ilə özünü büruzə verir.

Marneulidə fəaliyyət göstərən digər gözəllik salonu və gəlinlik mağazası olan “Azadə Salon”un sahibi donu kirayə götürəndə saç və makiyajın qiymətində endirim olduğunu vurğuladı.

“Biz sadəcə kirayə veririk, satış yoxdur. Donları Türkiyədən gətiririk. Bizdən gəlinlik götürəndə saç-makiyajı da endirimlə edirik. Saç-makiyaj ikisi birlikdə 150 laridirsə, 100 lariyə edirik. Gəlinlik, saç-makiyaj və maşının bəzədilməsi hamısı bir yerdə 1500-2500 lariyə başa gəlir. Qiymət seçilən donun parçasına və keyfiyyətinə görə dəyişir. Hələlik müştəri yoxdur. Bu ay məhərrəmlik ayı idi, Ramazan ayında və may aylarında toy olmur. Müvafiq olaraq müştəri də olmur”, - Azadə Bayramova bildirdi.

Marneulidə, salonlarda göstərilən xidmətlərin və kirayə gəlinliklərin qiyməti belədir:

• Kirayə gəlinlik – 300-1500 lari
• Saç-makiyaj – 100-150 lari
• Maşınların bəzədilməsi xidməti

Marneulinin toy donları və gözəllik salonları sahibləri bildirirlər ki, Marneuli Tbilisi ilə müqayisədə sərfəli qiymətlərinin olması ilə seçilir. Əsas müştərilərin isə yerli sakinlərin olduğunu söyləyirlər.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---