"Vahid Milli Hərkat" partiyasının Marneulidən majoritar deputatlığa namizədi Nərgiz Əliyeva 2 və 85 saylı seçki məntəqələrində qayda pozuntularının davam etdiyini deyir.

O, "Marneuli" radiosu ilə söhbəti zamanı bildirdi ki, "Gürcü Arzusu"-nun 2 saylı seçki məntəqəsinin sədri bir neçə dəfə səsvermədə iştirak edib. Bu zaman "VMH" partiyasının müşahidəçisi onun bu addımını telefonla videoya çəkmək istəyib. Məntəqə sədri xanım müşahidəçinin mobil teelfonunu yerə ataraq onun video çəkməsinə mane olub.

Əliyeva həmçinin 85 saylı seçki məntəqəsində də qayda pozuntularının olduğunu qeyd etdi. Onun sözlərinə görə, 85 saylı seçki məntəqəsində kişilər qadınların yerinə səsvermə prosesində iştirak edirlər. 

Bu gün, 2 oktyabr tarixində Gürcüstanda yerli özünüidarə seçkiləri keçirilir. Marneulidə 91 seçki məntəqəsi var.