Etnik azlıqların dövlət dili bilməmələri problemi - Semral İlqarovun səsli fikiri
Düşünürəm ki, Gürcüstanda yaşayırıqsa, bir
vətəndaş olaraq hər birimiz dövlət dilini bilməliyik. Yaşadığımız
dövlətin dilini bilmək bizim vətəndaşlıq borcumuzdur. Amma bu o
demək deyil ki, hamımız dövlət dilini qüsursuz şəkildə
bilirik.
İndiki dövrə nəzər yetirsək gənclərin bir çoxunun gürcü dilini necə
yaxşı bildiklərinin şahidi olarıq, lakin yaşlı nəsil haqqında eyni
fikri söyləmək çətindir. Etnik azlıq olaraq çoxluq təşkil etməmizə
baxmayaraq, dil problemi bizim bir çox hadisələrdən məlumatsız
qalmamıza səbəb olur. Xüsusən də yaşlı nəsil nümayəndələri ölkədə,
yaşadığımız regionda baş verən ən son xəbərləri gürcü dilli dövlət
kanallarından deyil, qonşu ölkənin kanallarında yayımlanan xəbərlər
vasitəsi ilə izləyib məlumatlanırlar.
Son zamanlar ölkədə baş verən hadisələrə də toxunmaq istəyirəm.
Paytaxt Tbilisidə keçirilən aksiyalarda iştirak edən bir qrup
azərbaycanlılar gürcü kanalına olan müsahibələri zamanı aksiyada
hansı səbəblə iştirak etdiklərindən xəbərsiz olduqlarını deyirlər.
Telekanalın hazırladığı sujetə baxanda həm əsəbiləşir, həm utanc
hissi yaşayırdım.
İndi isə bunun səbəblərinə aydınlıq gətirəcəyəm...
Yaşlı nəslin dövlət dilini bilməmələri normal haldır, çünki onların
dövründə rus dili daha çox önəm daşıyırdı, bu səbəbdən də
gənclərdən fərqli olaraq onlar gürcü dilini bilmirlər. Buna
baxmayaraq, onlar paytaxtda keçirilən aksiyada iştirak edirlər.
Təbii ki, aksiyada hər kəs iştirak edə bilər. Ancaq kadrdan da
görünürdü ki, onlar aksiyanın hansı məqsədlə keçirildiyindən
xəbərsiz olmalarına baxmayaraq dəstək üçün orada idilər. Bəlkə də
öz istəkləri ilə deyil, siyasi qruplar tərəfindən
göndərilmişdilər... Kadrlarda vətəndaşların dil bilmədiklərinə görə
utandıqları açıq-aydın görünürdü. Ən azından onlar aksiyaya
göndəriliblərsə, heç olmazsa onlara aksiyanın keçirilməsinin
səbəbləri haqqında məlumat verilərdi. Ayrıca media nümayəndələrinin
məqsədi də birmənalı deyil, bəlkə onlar da hansısa siyasi qruplar
tərəfindən bilərək göndərilmişdilər... Bəlkə də onların məqsədi
sadəcə azərbaycanlıların dil problemini qabardılmış şəkildə
götərməkdir? Kim bilir...
Nəyə görə biz zəif nöqtələrimizdən vurulmalıyıq?.. Nəyə görə media
tərəfindən çəkilməli və gülüş hədəfinə çevrilməliyik?..