Turizmin ən qızğın çağında aviareyslər dayandırılır - Xəlil Nurinin səsli fikiri
Rusiyayönümlü siyasi vədlərlə hakimiyyətə
gələn “Gürcü arzusu” hökuməti ağır günlər keçirir.
Bu
məqamda Rusiyanın bu hakimiyyəti rahatladacaq addımlar atması
gözləniləndir. Amma son bir neçə ay içərisində Rusiyanın atdığı
addımlara diqqət etsək, hökuməti daha çətin vəziyyətə saldığının
şahidi olarıq.
Turizmin ən qızğın çağında aviareyslər dayandırılır
Son 5-6 ay ərzində Rusiya işğal etdiyi əraziləri genişləndirir və
bir neçə nöqtədə “sərhəd xətti” çəkir.
Gürcüstan Xİ naziri Rusiyalı həmkarı ilə görüşmək təşəbbüsünə
müsbət cavab alaraq Nyu-Yorkda görüşür. Görüşdən sonra Gürcüstan
müxalifəti və ictimai fəalların tələbi nəticəsində açıqlama vermək
məcburiyyətində qalan nazir “İşğal olunmuş əraziləri müzakirə etmək
üçün hər iki tərəfin təşəbbüsü idi” desə də, Lavrov “Gürcüstan
tərəfinin təşəbbüsü idi, aviareyslərin bərpasını müzakirə etdik”
deyərək həmkarını və onun təmsil etdiyi hökuməti çətin vəziyyətə
salır.
Gürcüstan və Rusiya arasında danışıqları aparan Abaşidze və
Karasinin görüşündən sonra Rusiya tərəfi “Tiflisdə Rus Mədəniyyət
Mərkəzinin açılmasına qərar verdik” – deyir, Gürcü tərəfi isə
sadəcə ödənişli Rus dili kursunun açılacağını deyərək Rus tərəfini
yalanlamaq məcburiyyətində qaldı.
Bütün sadalananlar göstərir ki, Gürcüstanda hakimiyyətə kimin
gəlməsindən asılı olmayaraq, Rusiya heç bir zaman geri addım
atmayacaq və işğalçı siyasətindən dönməyəcək. Gürcüstanda siyasi
böhranın dərinləşdiyi bir dövrdə Rusiya “Gürcü arzusu”ndan sanki
bir an öncə qurtulmağa çalışır. Belə deyilsə, özünə yaxın hesab
etdiyi hökuməti nə üçün çətin vəziyyətə salır? Rusiyanın B planı nə
ola bilər? Niyə indi hərəkətə keçdi?
Fikrimcə, Rusiya özünə yaxın hesab etdiyi “Gürcü arzusu”nun 2020-ci
il Parlament seçkisində rahatlıqla olmasa da, qalib olacağını
hesablamışdı. Çünki son seçkidə hamısını qazandığı majoritar
mandatların 70%, proporsional sistemdə isə 35-40% belə hakimiyyətin
dəyişməməsi üçün kifayət edir.
Hər şey plana görə gedirdi. Amma Rusiyalı deputatın Gürcüstan
Parlamentində çıxış etmək istəyi, müxalifətin buna qarşı çıxması
ilə başlayan, sonrasında partiya mənsubiyyəti olmadan bütün
Gürcüstan vətəndaşlarının etiraz etdiyi 20 iyun gecəsinin qanlı
bitməsi Kremlə “evdəki hesabın bazara” uymadığını göstərdi....
Ruslar B planına keçək məcburiyyətində qaldı.
Qanlı 20 iyun gecəsindən bir neçə ay öncə Gürcüstan gündəmi: Son 1
il ərzində Tbilisi gündəmini məşğul edən “Gürcüstanın
Bakı-Tbilisi-Ceyhanı” sayıla biləcək Anaklia limanı. Qara dənizdə
ən yüksək yük daşıma potensialı olan ölkələrdən biri Gürcüstan
olmasına baxmayaraq, ən az yük daşıyan ölkədir. Bunun səbəbi isə
Poti və Batumi limanlarının çox konteynerli gəmiləri qəbul edə
bilməməsidir. Bu gəmiləri qəbul etmək üçün dərinliyi böyük olan
Anaklia limanının tikilməsinə ehtiyac var. Rusiyanın Anaklia
limanını istəməməsinin səbəbi Gürcüstanın maliyyə asılılığından
çıxmasında limanın ciddi kömək olacağıdır. Buna görə də Moskva bir
mənalı bu limanın tikintisinə qarşıdır. Anaklia limanının
tikilişinə mane ola biməyəcəyini anlayan Rusiya, İvanişvilinin
başçılığı ilə tikintinin özünə yaxın maqnatların nəzarətində
olmağını istəsə də, keçmiş baş nazir Mamuka Baxtadze ABŞ-a səfəri
zamanı rəsmi Vaşinqtondan “Anaklia limanını TBC qrupunun tikməsini
istəyirik” cavabı almışdı. Kremlə aydın oldu ki, TBC bankın
qurucusu və səhmdarı Mamuka Xazaradze və Badri Caparidze
Vaşinqtonun gözündə təkcə bankir kimi görünmür. Bu iki şəxs
haqqında 12 il əvvəl həyata keçirilmiş maliyyə əməliyyatı ilə bağlı
cinayət işi açıldı. Bu maliyyə əməliyyatından zərər çəkən olmasa
da, vergi gizləmə olmasa da, şikayətçi olmasa da, prokurorluğun
“qara pul yuma” adı ilə açdığı məhkəmə işi davam edir. Amma
bankirlərin qurduğu “LELO” hərəkatı yaxın zamanda siyasi partiyaya
çevriləcək. Görünən odur ki, Qərb Gürcüstanda erkən seçimə
qarşıdır. 2020-cil il Parlament seçkilərinin proporsional sistemlə
keçiriləcəyinə söz verən hakim partiya Konstitusiya dəyişmək üçün
keçirilən səsvermədə türklər demişkən “yan çizdi”. Qanun
layihəsinin keçmədiyini görən müxalifət və vətəndaş cəmiyyətinin
nümayəndələri “proporsional seçki” və “növbədənkənar seçki”
tələbləri ilə etiraz aksiyalarına başladı.
Çox keçməmiş etirazçılara Qərbin seçkinin zamanında keçirilməsindən
yana olduğu aydın oldu ki, tələblərdən biri səsləndirilməməyə
başladı. Birləşmiş müxalifət sadəcə “Proporsional seçki” tələb
etməyə davam edir. Fikrimcə Qərb “Gürcü arzusu” və “VMH”
partiyalarının elektoratı olmayan seçiciləri ətrafında birləşdirə
biləcək, yeni dil, yeni baxışla hərəkət edəcək, Qərbyönümlü bir
siyasi güc formalaşdırmağa çalışır. Hələ ki getdikcə genişlənən,
NATO və AB-yə inteqrasiya siyasəti yürüdücəyini açıqlayan siyasi
güc “LELO” görünür. Rusiyanın “Gürcü arzusu”nu sıxıntıya soxan və
erkən seçimə yönləndirən siyasəti bu səbəbdən olmalıdır. Çünki,
növbədən kənar seçki keçirlərsə, qalib “Gürcü arzusu” və ya “Vahid
Milli Hərəkat” partiyalarından biri olacaq. Putin nə qədər
işğalçı-imperialist siyasət yürütsə də, keçmiş təcrübədən yaxşı
bilir ki, Rusiyaya qarşı ən aqressiv siyasi güc belə bilinməyən
siyasi gücdən daha yaxşıdır. Bu səbəbdəndir ki, Rusiya
İvanişvilinin qalmasına, amma olmazsa, Saakaşvilinin qayıtmasına
razıdır. Yetər ki, təzə güc gəlməsin. Atalar demişkən təzə süpürgə
yaxşı süpürür axı.
Rusiyanın yeni bir gücü istəməməsinin səbəbi növbəti
yazıda....