Əzəldən bugünə kimi müharibələrdə qadın obrazı böyük simvol olub
önəmli məna daşıyıb.
Bir çox xalqın ədəbiyatında, folklorunda, ithaf olunmuş şeirlərində
torpaq qadın-ana obrazı ilə eyniləşdirilir (torpaq-ana, ana-vətən
deyilir).
Bir çox yazıçı vətən haqqında yazanda onun təsvirini yaşıl çəmən
üzərində qaçan azyaşlı qız uşağının gülməyi ilə, qəhqəsi ilə
verir.
Şəhid köynəyinin cibindən həyat yoldaşının, uşagının şəklinin
tapılmasını da çox görmüşük. Səngərdə duran hər döyüşçünün ürəyində
ona mənəvi güc verən qadını var.
Torpağın qadın obrazına bürünməsinin də özünəməxsus mənası və
səbəbi var. Vətənin fəryadı sinəyə dağ çəkib oğlanı igid-ər edən
qadın səsi var.
Tarixə göz gəzdirsək torpağı işğal etmiş düşmənlərin yerli
qadınlara, qızlara “toxunduğunu” görərik. Kərbəla müsibətində
Hüseyni öldürüb, Zeynəbin başından hicabını açıb özünü də əsir
götürüblər. Bir xalqın namusuna, qeyrətinə toxunaraq xalqa ikiqat
zərbə endirib ruhən sındırıblar.
Gürcüstanda Azerbaycana dəstək aksiyası keçirib Şuşanın azad
olunmağını qeyd etdilər, bugün isə Qarabağın, xalqın zəfərini qeyd
edirdilər. Diqqət çəkən məqam isə o oldu ki, bu yığıncaqlarda
qadınlar, qız uşaqları yox idi.
Dəstək aksiyalarında, qələbəni qeyd etmək mərasimlərində
qadınların, qız uşaqlarının olmağı, şəhid analarına, dul qalmış
gəlinlərə, atadan məhrum edilmiş uşaqlara hörmət və minnət
bildirmək demək olardı.
Qələbəni qeyd edəndə qız uşaqlarınızı çiyinlərinizə qaldırın. Çünki
qələbənin qadın üzü var.Qələbə insanlar arasında həmişə ananın
sevinc göz yaşlarıyla, həyat yoldaşının təbəssümüylə, qız uşağının
atasının qucağına qaçmağıyla yansılanıb.
Müəllif: Şəhəyat Sadığova