Ukraynada Rusiya bombardmanından tələm-tələsik evakuasiya olunan kimsəsiz uşaqlar Türkiyənin kurort şəhərində nəzarətsiz qalıblarmış. Jurnalistlərin korrupsiya araşdırmaları layihəsi olan OCCRP dekabrın 3-də belə bir araşdırma yayıb.

Araşdırma Ukraynanın slidstvo.info və Çexiyanın investigace.cz qurumları ilə birlikdə aparılıb.

Ukraynanın dördüncü böyük şəhəri Dneprdə bir internat məktəbindən yeniyetmələri Türkiyənin cənubundakı Antalya şəhərində otelə aparıblar. Qızlardan biri danışıb ki, ilk tapşırıqlarından biri sahili yosunlardan, hamam otaqlarını kifdən təmizləmək olub. OCCRP bunları yeddi uşaqla müsahibələr, eləcə də Ukraynanın özünün tərtib etdiyi konfidensial hesabata əsasən yazır.

Əvvəlcə yemək pis olmayıb, şərait sonradan pisləşib. Uşaqlar bəzən yeməyin içindən tük, qurd çıxdığını deyiblər. Kiflənmiş otaqlarda həddən çox uşaq yerləşdirilib. Onlara kameralar qarşısında oxumaq, oynamaq tapşırılıb. Sonra bu videolardan ianə yığmaq üçün istifadə olunub. Çəkilmək istəməyənləri cəzalandırıb, utandırıblar.

"Sizi yedizdirir, hər şeyin pulunu verir, hər yerə aparırlar. Siz isə çəkilmək istəmirsiz?", – bir qız onlara belə deyildiyini xatırladır.

İki yeniyetmə türkiyəli kişilərdən hamilə qalıb
Uşaqların tələsik evakuasiyasını Ukrayna hökuməti deyil, yerli multimilyoner biznesmen təşkil edib. Yerli qurumlar Ruslan Şostak adlı biznesmenə kimsəsiz uşaqların evakuasiyası üçün müraciət edib. O da tələm-tələsik Ruslan Şostak Xeyriyyə Fondu yaradıb. Dnepropetrovskda 10-dan çox internat məktəbi və kiçik qayğı mərkəzlərindən 3 min 500 uşaq və onların baxıcıları "Müharibəsiz uşaqlıq" devizi altında köçürülüb.

2024-cü ilin martında Ukrayna Ombudsman ofisi otellərin birində təftiş aparıb, oradakı şəraitlə bağlı hesabat hazırlayıb. Yüzlərlə uşağın sistematik olaraq fiziki şiddət gördüyü, adekvat tibbi yardım almadığı, hərdənbir onlayn dərslərə qatıldığı qeyd olunub. Hesabatda o da yazılıb ki, baxıcılar uşaqlara təzyiq göstərib, şəraitlə bağlı açıq danışmamağı tapşırıb.

Uşaqları ötən ilin sonunda Ukraynaya qaytarıblar. Onlardan ikisi daha öncə qaytarılmışdı, otelə girmiş türkiyəli kişilərdən hamilə qalıblarmış. Qızların yaşı, Türkiyə qanunvericiliyinə görə, cinsi əlaqəyə razılıq vermək həddinə çatmasa da, xeyriyyə fondu bu barədə hüquq-mühafizə orqanlarına xəbər verməyib.


"Çox uşaq bir yerdə olanda nələrsə baş verə bilər"
Şostak slidstvo.info-ya ikisaatlıq müsahibəsində uşaqlarla işini "vacib", "gərəkli" adlandırıb. Deyib ki, komandası ilə birlikdə çətin şəraitdə mümkün olan ən yaxşı işi gerçəkləşdirib. O, problemlərə görə məsuliyyəti baxıcıların, uşaqları müşayiət edən internat işçilərinin üzərinə yıxıb.

Şostak Ombudsmanın "Larissa" otelindəki şəraitlə bağlı hesabatını oxumadığını desə də, onun gəldiyi nəticələri "qüsurlu" adlandırıb.

"Uşaqları qorumaq üçün təhlükəsizlik sistemləri, dörd sərhəd qurmuşduq... Amma, görünür, çox uşaq bir yerdə olanda nələrsə baş verə bilər", – o deyib.

OCCRP bu hesabatın ictimaiyyətə açıqlanmadığını yazır. Sənəddə bir sıra tövsiyələr yer alıb – uşaqların daha yaxşı müəssisələrə yerləşdirilməsi, rəsmi təhqiqat aparılması kimi. Amma tövsiyələrə necə əməl olunduğu da bəlli deyil. Jurnalistlər Ukraynanın çoxsaylı hökumət orqanlarından suallarına cavab ala bilməyiblər.

Ombudsman aparatı da hesabatı şərh etməyib.

Türkiyə hökuməti dekabrın 1-də bildirib ki, ukraynalı qızların hamilə qalması barədə onlara rəsmi şikayət daxil olmayıb. Qısa açıqlamada deyilir ki, Türkiyənin Ailə və Sosial Xidmətlər Nazirliyi iddialardan daha sonra xəbər tutduqda kriminal şikayət verib, hüquqi prosedurlar başladıb. Amma şikayətin kimdən verildiyi, nəticəsi açıqlanmır.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.