“Beynəlxalq Şəffaflıq – Gürcüstan” təşkilatının məlumatına görə, Korrupsiyanın Qavranılması İndeksində Gürcüstanın reytinqi 3 bal azalıb. Təşkilatın dərc etdiyi 2025-ci il üzrə Korrupsiyanın Qavranılması İndeksinin (CPI) nəticələrinə əsasən, Gürcüstanın balı 3 vahid azalaraq 50-yə düşüb.

“Beynəlxalq Şəffaflıq – Gürcüstan”ın izahına görə, 100 ballıq şkala üzrə 50 orta nəticə hesab olunur. Gürcüstan bu qədər aşağı balı sonuncu dəfə 2013-cü ildə almışdı. Buna baxmayaraq, ölkə Şərqi Avropa və Mərkəzi Asiya regionunda yenə də birinci yeri qoruyur.

“Korrupsiyanın Qavranılması İndeksi əsasən hər hansı ölkənin dövlət sektorunun korrupsiyaya nə dərəcədə həssas olduğunu ölçür. Məsələn, xırda rüşvətxorluğun nə qədər yayılmış olduğunu göstərir. Gürcüstanın orta bal toplaması onu göstərir ki, ölkədə xırda rüşvətxorluq geniş yayılmayıb. Lakin indeks dövlətin ələ keçirilməsi və kleptokratiya kimi korrupsiyanın daha mürəkkəb formalarını ölçmür. Gürcüstanda korrupsiya baxımından əsas problem məhz bunlardır.

Korrupsiyanın Qavranılması İndeksi 181 ölkədə aparılır. Ölkələr 100 ballıq sistemlə qiymətləndirilir; burada 100 müsbət, 0 isə mənfi nəticə sayılır.

2025-ci ilin nəticələrinin müşayiətedici təhlilinə görə, Gürcüstanın balının azalması və nəticə etibarilə korrupsiya riskinin artması birbaşa demokratiyanın geriləməsi və ölkədə avtoritarizmin güclənməsi ilə əlaqələndirilir.

Gürcüstan nümunəsində açıq görünür ki, demokratik geriləmə korrupsiya risklərini birbaşa artırır. Hakim partiyanın qəbul etdiyi qondarma “xarici agentlər haqqında” qanun və qrantlar haqqında qanun antidemokratik tədbirlər kimi qiymətləndirilir. Bu qanunlar qeyri-hökumət təşkilatlarının legitim fəaliyyətini kriminallaşdırır və müstəqil aktorları xarici agent kimi təqdim edir.

Partiya həmçinin fərqli fikrə qarşı siyasi motivli cinayət təqiblərini, medianın məhdudlaşdırılmasını, qeyri-hökumət təşkilatlarının bank hesablarının dondurulmasını, eləcə də etirazçılar və jurnalistlərin zorakılıqla dağıdılmasını gücləndirib.

2024-cü ildə mübahisəli seçkilərdən və Avropa İttifaqı ilə inteqrasiya danışıqlarının dayandırılmasından sonra beynəlxalq müşahidəçilər Gürcüstanda avtoritar istiqamətə dönüş barədə danışırlar. Bu proses müxalif partiyaların qadağan edilməsi və dövlət qulluğu, polis və məhkəmə sistemi üzərində siyasi nəzarətin gücləndirilməsi cəhdləri ilə özünü göstərir. Bu isə korrupsiya risklərini ciddi şəkildə artırır və ümumilikdə Gürcüstan cəmiyyətinə zərər vurur.

2012-ci ildən etibarən CPI göstəriciləri əhəmiyyətli dərəcədə azalan ölkələrin təxminən üçdə ikisində söz, birləşmə və toplaşmaq azadlıqlarının məhdudlaşdırılması istiqamətində narahatedici tendensiyalar müşahidə olunur.

Son on il ərzində Gürcüstan, İndoneziya, Peru və Tunis kimi ölkələrdə qeyri-hökumət təşkilatlarının fəaliyyətinə siyasi müdaxilə nəticəsində hökumətlər maliyyəyə çıxışı məhdudlaşdıran və ya hökuməti yoxlayan və tənqid edən təşkilatların birbaşa bağlanmasına yönəlmiş yeni qanunlar qəbul ediblər. Bu proses çox vaxt böhtan kampaniyaları və təhdidlərlə müşayiət olunur.

Belə bir şəraitdə müstəqil jurnalistlər, vətəndaş cəmiyyəti təşkilatları və ifşaedicilər üçün korrupsiya barədə sərbəst danışmaq daha çətinləşir, korrupsiyaya bulaşmış vəzifəli şəxslərin isə səlahiyyətlərindən sui-istifadə riski artır”, – deyə “Beynəlxalq Şəffaflıq – Gürcüstan”ın bəyanatında bildirilir.

Mənbə: İnterPressNews

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.