Orbelianilər Sarayında 12 fevralda keçirilən görüşdən sonra Gürcüstana səfər edən Xorvatiya Prezidenti Zoran Milanoviç və onun ev sahibi olan həmkarı Mixeil Kavelaşvili açıqlama veriblər.

Mixeil Kavelaşvilinin sözlərinə görə, “bu səfər bizim ölkələr arasında bütün ortaq maraq sahələrində əlaqələrin dərinləşməsinə əlavə impuls verəcək.”
O, iki ölkəni birləşdirən ümumi dəyərlər bazasını, suverenliyin və sülhün əhəmiyyətini xüsusi vurğulayıb.

“Bizim ölkələr üçün tarixi yaddaş, mədəni identiklik, ənənələr və xristianlıq xüsusi əhəmiyyət daşıyır. Məhz bu möhkəm təməllər üzərində duran xalqlarımız bu sürətlə dəyişən dünyada öz milli maraqlarını və suverenliklərini qoruyurlar,” – deyə Mixeil Kavelaşvili bildirərək, hakim komandanın ölkənin suverenliyinin müdafiəsi ilə bağlı artıq bəyan etdiyi ritorikanı bir daha təkrarlayıb.

“Çağdaş çoxqütblü beynəlxalq düzəndə suverenliyin əsasını milli maraqların qorunması, iqtisadi müstəqillik və informasiya suverenliyi təşkil edir,” – Kavelaşvili deyib.

Avropa İttifaqı ilə münasibətlər
Mixeil Kavelaşvili bildirib ki, “hazırda Gürcüstan–Avropa İttifaqı münasibətləri bir sıra çağırışlarla üzləşib”, lakin ümid etdiyini də əlavə etdi ki, “konstruktiv və aktiv dialoq vasitəsilə Gürcüstanla Aİ arasında mövcud fikir ayrılıqlarını aradan qaldırmaq və münasibətləri normallaşdırmaq mümkündür.”

O, “Gürcü Arzusu” tərəfindən dəfələrlə səsləndirilmiş mövqeyi təkrar edərək qeyd etdi ki, “Aİ-nin genişlənmə siyasəti tez-tez Avropalı bürokratlar tərəfindən müraciət olunan manipulyasiya aləti olmamalıdır.”

Mixeil Kavelaşvilinin sözlərinə görə, “Gürcüstan son illərdə nümunəvi dözümlülük və prinsipiallıq göstərib, öz suverenliyini, milli maraqlarını və sülhünü qoruyub.” Onun fikrincə, Aİ-nin bir sıra ölkələri bunu “görməməzliyə vurmur” və “Avro-bürokratların aqressiv ritorikasından fərqli olaraq, dialoq və diplomatiyanı seçirlər.” Kavelaşvili hesab edir ki, bu ölkələrdən biri də Xorvatiyadır.

Zoran Milanoviçin açıqlamaları
Birgə bəyanatlar zamanı sinxron tərcümənin təqdim etdiyi məzmuna əsasən, Xorvatiya Prezidenti Zoran Milanoviç Gürcüstana gəlişini “həmrəylik jesti” kimi qiymətləndirdiyini dedi, lakin əlavə etdi ki, “son illərdə çox vaxt həmrəylik anlayışı çox sinik olub.”

Aİ, 2024-cü ildən bəri Gürcüstanın üzvlüyə qəbul prosesini, hökumətə maliyyə yardımını və “Gürcü Arzusu” hakimiyyətinin nümayəndələri ilə görüşləri dayandırıb. Səbəb: antidemokratik hesab edilən qanunlar, demokratiya, insan haqları və hüququn aliliyi sahələrində ciddi geriləmələr.

Aİ-nin ayrı-ayrı dövlətləri “Gürcü Arzusu” hökuməti ilə münasibətlə bağlı fərdi qərarlar qəbul edirlər. Dünən – dekabrın 11-də məlum oldu ki, Aİ əvvəlcədən təsdiqlənmiş yeni mexanizm çərçivəsində Gürcüstan diplomatik və xidməti pasport sahibləri üçün vizasız gediş-gəlişi dayandırıb.

“Rusiya agentidir” deyə ittiham olunan ölkə
“Ölkəniz özünü çıxılmaz dilemmalar qarşısında tapıb və bunu çox istehzalı şəkildə – cənab Kavelaşvilinin adlandırdığı kimi – Brüssel bürokratiyası, Avropa bürokratiyası edir. Onlar mənim adımdan danışa bilməzlər və onlara Xorvatiya adına danışmağa imkan da verməyəcəyəm. Buna görə də şəxsən buraya gəldim və tam səmimi desəm, 2025-ci ildə Aİ-dən heç bir yüksək səviyyəli səfər olmayıb. Bu ifadəmə görə üzr istəyirəm, amma bu, dəlilikdir. Mən bura gəlmək istəyirəm, elə bir ölkəyə gəlmək istəyirəm ki, onu prorusiyaçı, promoskvalı, proputinçi mövqedə ittiham edirlər. Amma mənim başqa təcrübəm var. Ola bilər yanılıram, amma bu elə bir ölkədir ki, Moskva ilə diplomatik münasibəti yoxdur və buna baxmayaraq onu Rusiya agenti olmaqda suçlayırlar. Bunu başa düşə bilmirəm. Ona görə qərara aldım ki, şəxsən gəlim və öz gözlərimlə görüm nə baş verir,” – deyə Zoran Milanoviç bildirib.

Milanoviç Aİ-yə üzv ölkələrin liderləri arasında 2024-cü ildən sonra Gürcüstana gələn ikinci liderdir. 2024-cü il parlament seçkilərindən sonra ölkəyə səfər edən ilk lider Macarıstanın Baş naziri Viktor Orban olmuşdu.

“Ölkəyə baryerlər yaradır, onu mənəvi dilemma qarşısında qoyurlar, ‘Moskvanın agenti’ adlandırırlar. Bu mənəvi şantajdır. Onlar bu ölkəni şantaj edirlər – əllərin qıvrılması, təzyiq göstərilməsi baş verir. Buna görə də Gürcüstana gəldim ki, bunu deyim,” – Milanoviç əlavə edib.

O, həmçinin ötən il Gürcüstanda keçirilən pro-avropa etiraz aksiyalarında həmrəylik nümayiş etdirmək üçün gəlmiş bəzi Aİ ölkələrinin nazirlərinin davranışlarını da xatırlayıb və qiymətləndirib:

“Gördüm ki, Aİ-yə üzv dövlətlərin nazirləri Gürcüstana gəlmişdilər ki, mitinqlərdə iştirak etsinlər və müxalifətə qoşulsunlar. Mən bunu beynimdə çevirdim– düşünürdüm ki, həmin siyasətçilər mənim ölkəmə, paytaxtıma, mərkəzi meydana gəlsəydilər, özümü necə hiss edərdim? Kim olmalarından asılı olmayaraq, mənim üçün fərqi yoxdur Gürcüstandakı siyasi tərəflər. Amma mənim üçün prinsip etibarilə qəbuledilməzdir ki, kiçik, siyasi cəhətdən təcrid olunmuş bir ölkəyə təzyiq edilsin – hansı ki, Aİ ilə münasibətlərdə çətinlik yaşayır. Mənim üçün bu ideyanın özü qəbuledilməzdir,” – deyə Xorvatiya Prezidenti vurğulayıb.

Milanoviç Gürcüstanın iqtisadi göstəricilərini də çox müsbət qiymətləndirdi.

Həmsöhbətinin yanaşmasını dəyərləndirən Mixeil Kavelaşvili bildirib ki, “Aİ-nin ləyaqətli ölkəsi olan Xorvatiya və onun prezidenti həqiqəti deyir və biz Avropa bürokra¬tiyasından və ölkəmizə qarşı ikili standart tətbiq edən nümayəndələrdən məhz belə səmimi danışıq tələb edirik.”

“Bu, həqiqi ləyaqətli liderin yanaşmasıdır və burada artıq heç nə yoxdur. Bu, sadəcə həqiqətin qəbuludur və bərabərhüquqlu ölkələrin ləyaqətli prezidentləri arasında əməkdaşlığın necə olması gərəkdiyinin nümunəsidir,” – Kavelaşvili əlavə edib.

Xorvatiya Prezidentinin həmkarının sözlərinə reaksiyası dərhal gəlib:
“Mən razı deyiləm ki, Xorvatiya pozitivdir, digərləri isə Gürcüstan üçün neqativdir. Avropadakı bir çox oyunçuların ümumiyyətlə mövqeyi yoxdur, münasibəti yoxdur və öz komfort zonasında özlərini çox rahat hiss edirlər. Onların yanaşması opportunistdir. Onların burada addım atmağa ehtiyacı yoxdur. Elə resurslar var ki, onlara Gürcüstanı anlamaları üçün kifayət edir — biz onları aqressivliyə təhrik etmirik, sadəcə digər Avropa ölkələrinə göstəririk ki, Aİ-nin vahid mövqeyi yoxdur və Aİ-nin daxilində çoxlarının sabit, aydın mövqeyi yoxdur,” – Milanoviç bildirib.

Gürcüstana rəsmi səfəri çərçivəsində, Zoran Milanoviç “Gürcü Arzusu” hökumətinin başçısı İrakli Kobaxidze və mübahisəli Parlament sədri Şalva Papuaşvili ilə də görüşəcək.

Zoran Milanoviç haqqında
Qərb mediası Zoran Milanoviçi Ukraynaya münasibəti və Finlandiya ilə İsveçin NATO-ya üzvlüyünə veto qoyacağı ilə bağlı hədələri səbəbindən prorusiyaçı mövqeli siyasətçi kimi təqdim edirdi.

Ukraynaya Rusiya ordusunun genişmiqyaslı müdaxiləsindən sonra Milanoviç Aİ tərəfindən Ukraynaya hərbi yardıma qarşı olanlar arasında idi və Rusiyaya qarşı sanksiyaları absurdluq hesab edirdi. 2022-ci ilin yanvarında, Ukraynada müharibə başlamazdan əvvəl, Zoran Milanoviç Ukraynanı ən korrupsiyalaşmış ölkələrdən biri adlandırmış və onun yerinin NATO-da olmadığını bildirmişdi. Bunun nəticəsində Ukraynanın Xarici İşlər Nazirliyi Xorvatiya səfirini çağırmışdı.

• Sol-mərkəzçi siyasi yönümlü Zoran Milanoviç 2020-ci ilin fevralından Xorvatiya Prezidenti vəzifəsini icra edir;
• İkinci dəfə 2025-ci ilin yanvarında keçirilmiş prezident seçkisinin ikinci turunda seçildi;
• Milanoviç səsvermədə təxminən 75% səs qazandı, bu, müstəqil Xorvatiya tarixində prezident seçkilərində namizədin əldə etdiyi ən yüksək nəticədir;
• 2011–2016-cı illərdə Xorvatiya Baş naziri olmuşdur;
• 2016-cı ilə qədər Sosial-Demokrat Partiyasına rəhbərlik etmişdir.

Milanoviç hüquq təhsili alıb: Zagrebdə Universitetdə hüquq ixtisası, Brüsselin Azad Universitetində isə Avropa hüququ üzrə magistr dərəcəsi əldə edib.
2024–2025-ci illərdə prezident seçkilərində kampaniyası zamanı şəxsi azadlıqların və azlıqların hüquqlarının qorunmasına diqqət yetirib.

Xorvatiyada onun şəxsi populyarlığı yüksəkdir; o, həm öz siyasi komandasını, həm də müxalif partiyaların üzvlərini tez-tez tənqid edir.

Milanoviç Xorvatiya Konservativ Partiyası “Xorvatiya Demokratik Birliyi”nin (HDZ) kəskin tənqidçisidir və onu korrupsiya və hakimiyyəti qorumaqda günahlandırır.

Onun çıxışlarında əsas vurğu milli suverenliyin qorunmasının vacibliyinə yönəlmişdir və hesab edir ki, ənənəvi siyasi elitalar Brüssel-in xarici siyasət gündəliyinə çox bağlıdır.

Milanoviçinin tənqidçiləri onun bu cür bəyanatlarını populist hesab edir və bunun Aİ ilə institusional əməkdaşlığa zərər verə biləcəyini bildirirlər.

Prezidentin rolu Xorvatiyada
Xorvatiya prezidentinin vəzifəsi icraedici deyil, daha çox təntənəli (seremonial) xarakter daşıyır; onun öhdəliklərinin əksəriyyəti konkret siyasi proqramların həyata keçirilməsini əhatə etmir.

Azlıqların hüquqları
Milanoviç açıq bəyan edib ki, Xorvatiyada heç kəs cinsi orientasiyası və ya gender kimliyinə görə ikinci dərəcəli vətəndaş kimi hiss etməməlidir. Onun sözlərinə görə, Xorvatiya LGBT+ insanlar üçün təhlükəsiz və açıq cəmiyyət olmalıdır.

2024-cü ildə o, Zagrebdə Pride tədbirinin iştirakçıları ilə görüşüb.

Xorvatiya eyni cinsli tərəfdaşlığı tanıyır, lakin 2013-cü ilin referendumundan sonra Konstitusiyaya əsasən eyni cinsli cütlüklərin nikahı qadağandır.

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

 

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.