Hakim Valerian Buqianișvili Tbilisi Şəhər Məhkəməsinin binasını yandırmağa cəhd etməkdə təqsirləndirilən siyasətçi Aleko Elisaşvilinin həbsdə saxlanılması qərarını qüvvədə saxlayıb. Elisaşvili isə bildirib ki, saxlanıldığı andan etibarən onun hüquqları pozulur.

Təqsirləndirilən siyasətçi Aleko Elisaşvili 9 martda, məhkəməyə qədərki iclasda ona ayrılmış vaxtdan istifadə edərək soruşub ki, niyə ona uşaqları və həyat yoldaşı ilə görüşmək qadağan edilib.

“Bu, sadizmdir”
Onun qiymətləndirməsinə görə, bu qərar hüquqi əsaslandırılmış qərar deyil, “sadizmdir” və bunu şahidlərə təsir göstərə biləcəyi arqumenti ilə izah etmək mümkün deyil.

“Ailə üzvlərim mənimlə görüşə gələndə və kameraların iştirakı ilə danışanda, onlar şahidlərə necə təsir göstərə bilərlər? Texniki olaraq izah edin, mən bunu necə etməliyəm... Siz elə düşünürsünüz ki, mən bu barədə öz uşağımla danışacağam?

Bu, sadizmdir. Məni onsuz da həbsə atmısınız, məndən qisas almaq istəyirdiniz? Buyurun, sakitcə oturmuşam... Amma bu sadizm nə deməkdir? Sizin kimi insanlar gecə necə yatır? Güzgüyə baxmırsınız? Övladlarınız yoxdur? Başqa nəyisə qadağan et, amma uşaqlarımla görüşməyi qadağan edirsən?” – Aleko Elisaşvili iş üzrə prokuror Mariam Berdzenișviliyə müraciətlə belə deyib.

Aleko Elisaşvilinin həbsdə olarkən xarici dünya ilə əlaqəsi qadağan edilib. Cinayət-Prosessual Məcəllə prokurorluğa belə qərar qəbul etmək səlahiyyəti verir. Qərar əsaslandırılmalı və ondan şikayət vermək mümkündür.

Siyasətçi Levan Xabeişviliyə də, Elisaşvili kimi, xarici dünya ilə əlaqə qadağan edilib – ona telefonla danışmaq, məktub göndərmək və ailə üzvləri ilə görüşmək imkanı verilmir.

Prokuror Mariam Berdzenișvili sonradan “Azadlıq Radiosu”na təsdiqləyib ki, Elisaşvilinin xarici dünya ilə əlaqəsinin qadağan olunması barədə qərarı şəxsən özü imzalayıb və bu qərara gəlməzdən əvvəl bir neçə amili qiymətləndirib. Bu amillərə təqsirləndirilənin şəxsi xüsusiyyətləri və əvvəlki təcrübəsi də daxildir.
Prokurorun sözlərinə görə:

“Cinayət-prosessual qanunvericiliyi həbsdə olan təqsirləndirilən şəxsə bəzi hüquqların həyata keçirilməsini qadağan edən qərar qəbul etməyə imkan verir – bu, telefonla danışıq və ya görüşlər ola bilər. Bu qərarda konkret ad və soyadlar (həyat yoldaşı, övlad və s.) göstərilmir; sadəcə olaraq xarici dünya ilə kommunikasiya qadağan edilir.

Bu işdə birbaşa şahidlər var və onlara müxtəlif formalarda – telefon əlaqəsi, vasitəçilər və s. vasitəsilə təsir göstərilməsi təhlükəsi mövcuddur. Biz bu risklərin qarşısını almalıyıq”.

O əlavə edib ki, belə qərar verilərkən təqdim olunmuş maddənin ağırlığı həlledici faktor olmasa da, qərar müxtəlif amillərin – təqsirləndirilənlərin xüsusiyyətlərinin, keçmiş təcrübəsinin, həyat tərzinin və əvvəllər cinayət əməlləri ilə əlaqəsinin – birlikdə qiymətləndirilməsi əsasında qəbul edilir.


“Mənə qandal vurulmuşdu, əllərimdən qan axırdı”
Aleko Elisaşvili 13 yanvar 2026-cı il tarixli məhkəmə iclasında da demişdi ki, əlavə məhdudiyyətlərin tətbiq olunduğu sərt rejimli həbsxanaya yerləşdirilməsi onun “səmimi dostu” Mamuka Mdinaradzenin şəxsi tapşırığı ilə baş verib.

Elisaşvili 15 aprel 2024-cü ildə, “agentlər haqqında qanun”un müzakirəsi zamanı, o vaxt deputat olan, hazırda isə Dövlət Təhlükəsizliyi Xidmətinin rəhbəri olan Mamuka Mdinaradzeyə yumruq vurmuşdu.

Hakim Valerian Buqianișvilinin sualına cavab olaraq – saxlanıldıqdan sonra hüquq-mühafizə orqanları tərəfindən qeyri-insani rəftara və ya işgəncəyə məruz qalıb-qalmadığı soruşulduqda, Elisaşvili “bəli” cavabını verib.

“Dörd saat ərzində əllərim arxadan qandallı idi. Sonra gördülər ki, əllərimin vəziyyəti çox pisdir – əvvəl müvəqqəti saxlama təcridxanasında, sonra da bölmədə gördülər ki, qandaldan əllərimdən qan axırdı... Yəqin xanım prokuror o polis əməkdaşlarını müdafiə edir...” – deyə saxlanıldığı günü xatırlayıb.

Bu hadisə ilk dəfə deyildi. Elisaşvili qandal məsələsini saxlanıldıqdan sonra keçirilən ilk məhkəmə iclasında da qaldırmış və bununla bağlı araşdırma aparılmasını tələb etmişdi.

Prokurorun sözlərinə görə, hüquq-mühafizə orqanlarının əməkdaşlarının təqsirləndirilən şəxslərə qarşı mümkün zorakılıq halları Tbilisi prokurorluğu tərəfindən araşdırılır, buna görə də o, bu barədə məlumatlı deyil. Onun bildiyinə görə, qurum Elisaşvilinin dediklərindən xəbərdardır.

Hakim soruşub: “Başqa hallar da olubmu?”

Elisaşvili cavab verib:
“Başqa hallar da var, amma ədalət haradadır... Əvvəllər də araşdırmalar aparılırdı – polis məni qrup halında döymüşdü, sonra isə həmin qurumu bağladılar”.

2024-cü il aksiyasında döyülməsi
2024-cü ildə “agentlər haqqında qanun”a qarşı keçirilən aksiyada Aleko Elisaşvili – o zaman deputat statusu da var idi – xüsusi təyinatlı qüvvələr tərəfindən fiziki zorakılığa məruz qalmışdı.

“Maestro” televiziya kanalının yaydığı videoda görünürdü ki, siyasətçi Rustaveli prospektində yerləşdirilmiş xüsusi təchizatlı hüquq-mühafizə əməkdaşlarına yaxınlaşır.

Bundan sonra xüsusi təyinatlılar aksiyanın digər iştirakçılarına bibər qazı səpirdilər, Elisaşvilini isə döydülər, köynəyini çıxardılar və yerə yıxdılar.

2 sentyabr 2024-cü ildə Elisaşvili bildirmişdi ki, ona hücum edən polis əməkdaşlarından birini tanıyıb və bu barədə hüquq-mühafizə orqanlarına məlumat verib, lakin heç bir reaksiya olmayıb. İki il keçməsinə baxmayaraq, istintaq hələ də davam edir.

“Həmin insidentdən sonra bir nəfər polisə belə ittiham irəli sürülməyib, onların heç biri müəyyənləşdirilməyib”, – Elisaşvili 9 mart 2026-cı ildə məhkəmə iclasında deyib. Bu iclasda isə artıq o özü təqsirləndirilən şəxsdir.

Ona qarşı irəli sürülən ittiham
Siyasətçi Aleko Elisaşvili terrorçuluqda, daha dəqiq desək, terror aktına cəhddə ittiham olunur.

İstintaqa görə, o məhkəmə binasını yandırmağa cəhd edib. Bu məqsədlə şənbə günü səhər saat 04:00 radələrində binanın yanına gəlib, odlu silah, döyüş sursatı və terror aktını həyata keçirmək üçün lazım olan əşyalarla silahlanmış vəziyyətdə şüşəni sındıraraq binaya daxil olub, yanacaq səpib, lakin məhkəmə mühafizəçiləri onun od vurmasına mane olublar.

Prokurorluğun məlumatına görə, Elisaşvilini mühafizəçilərdən biri görən kimi ona hücum edib və döyməyə başlayıb.

Prokurorluq bildirir ki, üç məhkəmə mühafizəçisi Elisaşvilini zərərsizləşdirməyə, onun yanar maddəyə od vurmasının qarşısını almağa və onu tərksilah etməyə çalışıblar.

“Hücum edən şəxs isə öz növbəsində odlu silahını çıxarmağa və istifadə etməyə cəhd edirdi”, – 30 noyabr tarixində prokurorluğun yaydığı bəyanatda deyilir.
Prokurorluq həmçinin müşahidə kameralarının görüntülərini də yayıb.

Elisaşvili “Şəhər Məhkəməsinin dəftərxanasını yandırmağı planlaşdırdığını” inkar etmir. O, əməli etiraf edir, lakin ittihamın hüquqi kvalifikasiyasını – terrorçuluq maddəsini – qəbul etmir.

Bu ittiham üzrə ona 10 ildən 15 ilədək azadlıqdan məhrumetmə cəzası təhlükəsi var.

İş hazırda məhkəməyəqədərki icraat mərhələsindədir. İşin mahiyyəti üzrə baxışın başlanma tarixi növbəti iclasda müəyyən ediləcək. Hakim Valerian Buqianișvili əvvəlcə tərəflərin sübutların qəbul edilə bilməsi ilə bağlı vəsatətlərinə baxmalıdır.

Növbəti məhkəmə iclası 18 martda keçiriləcək.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.