“Gürcü Arzusu” hökumətinin rəhbəri, baş nazir İrakli Kobaxidzenin sözlərinə görə, Konstitusiya Məhkəməsinə üç müxalif partiyanın qadağan edilməsi tələbi ilə verilmiş iddiaya düzəliş etmək lazım gələ bilər.

İrakli Kobaxidze hökumətyönlü “TV İmedi” telekanalının doqquz müxalifət partiyasının ittifaqı ilə bağlı sualını belə cavablandırıb. O bildirib ki, mövcud məlumata görə, bu partiyalar seçkilərdə 5 nömrə altında, vahid partiya və ümumi siyahı ilə iştirak etməyi planlaşdırırlar.

Kobaxidzenin sözlərinə görə, bu partiyalar “Vahid Milli Hərəkat”ın siyasi mühitindən yaranmış təşkilatlardır.

“Bizim üçün bunun yeganə nəticəsi odur ki, Konstitusiya Məhkəməsinə təqdim etdiyimiz iddianı korrektə etməli olacağıq. Yaranmış yeni konfiqurasiyaya uyğun olaraq partiyaların adlarının dəyişdirilməsi lazım gələcək”, – Kobaxidze 9 martda, Orbeliani sarayında gürcü fiqurlu konkisürənlərin Şərəf Ordeni ilə təltif olunması mərasimindən sonra jurnalistlərə açıqlamasında deyib.

Onun sözlərinə görə, bu siyahı genişləndirilə də bilər və Konstitusiya Məhkəməsinə təqdim edilən iddiaya bütün uyğun partiyalar daxil edilə bilər.

“Bu məsələ üzərində işləyəcəyik və müvafiq qərar qəbul edəcəyik”, – deyə Kobaxidze əlavə edib.

Kobaxidze bildirib ki, yeni yaradılmış birlik mahiyyət etibarilə iddiada göstərilən iki partiyanı təkrar edir.

“İddiada göstərilən iki partiya faktiki olaraq bu yeni birlikdə təkrarlanır. ‘Azadlıq Meydanı’ da tam şəkildə ‘Milli Hərəkat’ın siyasi mühitindən yaranmış partiyadır. Onların hamısı həm 2012-ci ildən əvvəl, həm də sonra ‘Milli Hərəkat’ və ya radikal müxalifətlə bağlı olublar – partiya sədrindən tutmuş bütün liderlərinə qədər”, – deyə Kobaxidze bildirib.

“Azadlıq Meydanı” partiyasının sədri Levan Tsutskiridze ilə bağlı dəqiqləşdirici suala cavab olaraq Kobaxidze deyib ki, o 2008-ci ildə seçkilərin saxtalaşdırılmasında iştirak edib.

“O, 2008-ci ildə seçkilərin saxtalaşdırılması prosesində iştirak edib. Bundan sonra onun dedikləri inandırıcı görünmür”, – Kobaxidze bildirib.

“Gürcü Arzusu”nun Konstitusiya Məhkəməsinə iddiası
“Gürcü Arzusu” ötən il 31 oktyabrda Konstitusiya Məhkəməsinə müraciət edərək üç müxalif partiyanın qadağan edilməsini tələb edib. Hakim partiya 2024-cü il parlament seçkilərində seçki baryerini keçmiş dörd partiyadan üçünün qadağan olunmasını istəyir:

• “Birlik – Milli Hərəkat”
• “Dəyişikliklər üçün Koalisiya – Qvaramia, Melia, Qirçi, Droa”
• “Güclü Gürcüstan – Lelo, Xalq üçün, Azadlıq üçün!”

“Gürcü Arzusu”nun iddiasına görə, bu partiyalar siyasi proseslərdə qeyri-konstitusion fəaliyyətlərdə, o cümlədən Gürcüstan dövlətinə qarşı aparılan sabotajda iştirak ediblər və illər boyu eyni mövqedən çıxış ediblər.

İddiada həmçinin qeyd olunur ki, bu üç partiya ilə “sıx əlaqədə olan” daha 10 partiya mövcuddur. Hakim partiya onları “formal, bir nəfərlik və kiçik partiyalar” adlandırır.
Bunlar aşağıdakılardır:

• Elene Xoştarianın “Droa” partiyası
• Zurab Caparidzenin “Qirçi – Daha çox azadlıq” partiyası
• “Strategiya Ağmaşenebeli”
• “Avropa Gürcüstanı”
• “Federalistlər”
• “Gürcüstan Respublika Partiyası”

“Hazırda onların siyasətə ciddi təsiri və seçki baryerini keçmək üçün real perspektivi olmadığına görə bu mərhələdə qadağan edilmələri zəruri hesab edilmir. Onların qeyri-konstitusionluğu məsələsi sonradan gündəmə gələ bilər – əgər siyasi proseslərə ciddi təsir imkanları əldə etsələr”, - iddiada qeyd olunur.

Doqquz müxalifət partiyasının ittifaqı
2 martda müxalifət partiyaları – “Dəyişikliklər üçün Koalisiya”, “Qirçi – Daha çox azadlıq”, “Droa”, “Milli Hərəkat”, “Strategiya Ağmaşenebeli”, “Federalistlər”, “Milli-Demokrat Partiyası”, “Avropa Gürcüstanı” və “Azadlıq Meydanı” – ittifaq yaratdıqlarını elan ediblər.

Onların açıqlamasına görə, bu ittifaq strateji və fəaliyyət qaydaları üzrə birgə razılaşmanı nəzərdə tutur.

Razılaşdırılmış əsas prinsiplər
Müxalifət partiyaları üç prinsip üzrə razılığa gəlib:

1. “Müxtəliflik daxilində birlik” – partiyalar ideoloji kimliklərini qoruyur, lakin vahid etiraz aksiyaları və kommunikasiya strategiyası üzərində razılaşırlar.
2. “Demokratik alternativ” – qərarlar bərabərlik prinsipi ilə və kənar təsirlərdən azad şəkildə qəbul edilir.
3. “Siyasi və ictimai konsensus” – məqsəd demokratik koalisiya hökumətinin formalaşdırılması və zəruri islahatların həyata keçirilməsidir.

“Müxalifətin ittifaqı sonadək mübarizə aparacaq – siyasi məhbusların azad olunmasına və azad, ədalətli seçkilərdə qələbəyə qədər”, - birgə bəyanatda deyilir.

Kobaxidzenin bəyanatına reaksiyalar
“Bizim üçün hər hansı bir siyasi partiyanın qadağan edilməsi hamısının qadağan olunması deməkdir. Bu isə Gürcüstanda siyasi prosesin ləğv edilməsinə cəhd deməkdir”, - İttifaq nümayəndələri “Azadlıq Radiosu”na bildiriblər.

Onların sözlərinə görə, vahid siyahı və seçki konfiqurasiyası barədə müzakirə hazırkı şəraitdə mənasızdır, çünki əvvəlcə yeni, azad və ədalətli seçkilərin keçirilməsi təmin olunmalıdır.

“Seçkilər əldə olunduqdan sonra qələbə üçün necə lazım olarsa, ittifaq razılaşmasında nəzərdə tutulduğu kimi birlikdə hərəkət edəcəyik.”

“Azadlıq Meydanı” partiyasının baş katibi Bakur Kvaşilavanın sözlərinə görə, Kobaxidzenin onların partiyası barədə dedikləri “tamamilə yalandır”.

Onun fikrincə, bu iddialar o qədər aydın olacaq ki, nəticədə “Gürcü Arzusu geri çəkilməli və əsassız ittihamlarını geri götürməli olacaq”. Buna görə də o hesab edir ki, əgər Gürcüstanda hüquqi dövlət varsa, “Azadlıq Meydanı” partiyasının iddiaya daxil edilməsi mümkün deyil.

Yenilənmə
Sonradan “Azadlıq Meydanı”nın sədri Levan Tsutskiridze sosial şəbəkədə paylaşım edərək Kobaxidzenin 2008-ci il seçkilərinin saxtalaşdırılmasında iştirak etdiyi barədə iddiasını “tam yalan və siyasi təbliğat” adlandırıb.

“Həqiqət isə ‘Gürcü Arzusu’ üçün çox narahatedicidir:
Niyə bir neçə il əvvəl şəxsən Şalva Papuaşvili məndən Ombudsman seçimi üzrə komissiyada iştirak etməyi xahiş etmişdi?

Niyə mənim təşkilatım onlara və digər partiyalara institusional güclənmə və daxili demokratik proseslərin inkişafında kömək edəndə ‘Gürcü Arzusu’ mənə təşəkkür edirdi?

Onlar üçün sən onlara kömək etdiyin müddətdə ‘peşəkar’, müstəqil siyasi alternativ yaratdığın anda isə ‘düşmən’ olursan”, - o, sosoial şəbəkədə yazıb.

O əlavə edib ki, onun bioqrafiyasında şübhəli heç nə yoxdur, yalnız həmişə açıq və şəffaf olmuş peşəkar fəaliyyət yolu var.

Tsutskiridze həmçinin İrakli Kobaxidzeni ictimai debatlara dəvət edib:

“Gəlin, açıq debatda görüşək – əgər kabinetdən çıxıb insanların qarşısına çıxmaqdan qorxmursunuzsa.”

Bundan əvvəl Gürcüstanın beşinci prezidenti Salome Zurabişvili də Kobaxidzenin bəyanatına sosial şəbəkədə reaksiya verib.

“Gürcüstanda terror hər gün yeni addım atır. Baş nazir Kobaxidze yeni qanunlar anons edir ki, bunlar yeni yaradılmış siyasi partiyalara qarşı cinayət məsuliyyətini genişləndirəcək. Dinc etirazçıların həbsi davam edir... Ədalət olmayacaqsa, sülh də olmayacaq.”

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.