Gürcüstanın Patriarxı III Şio 17 may tarixində, Ailə Müqəddəsliyi Günündə toplaşmış əhaliyə müraciət edib və bəyan edib ki, əgər Gürcüstanda demoqrafik vəziyyət düzəlməsə, Gürcüstanda “başqa xalqlar” çoxalacaq və gürcülərin sayını ötüb keçəcək.

“Əgər demoqrafik vəziyyətimizi düzəltməsək, ailənin möhkəmləndirilməsinə, xilas edilməsinə və qorunmasına diqqət yetirməsək, uşaqları sevən, uşaqlarını tərk etməyən, dinini qoruyan və buna görə də yaxşı çoxalan

digər xalqların da cənnət kimi gözəl və möhtəşəm ölkəmizdə məskunlaşması təhlükəsi ilə üzləşəcəyik. Əlbəttə ki, Allah bizi qoruya bilər, amma belə davam etsək, bu təhlükə realdır ki, onlar gürcülərdən çox olacaqlar”, – III Şio bəyan edib.

Patriarxın bəyanatına etnik azlıq nümayəndəsi olan siyasətçilər, mülki fəallar və hüquq müdafiəçiləri reaksiya veriblər. Onlar hesab edirlər ki, patriarx tərəfindən edilmiş bəyanat xoşagəlməz və ağrılıdır. III Şionun bəyanatı Gürcüstan vətəndaşı olan etnik azlıqlara özlərini yenidən ikinci dərəcəli vətəndaş kimi hiss etdirir.

Siyasətçi və mülki fəal Ceyhun Məhəmmədəli sosial şəbəkədə III Şionun bəyanatına reaksiya verib və qeyd edib ki, demoqrafiyaya qayğı vətəndaşları bölücü bəyanatlarla deyil, siyasi cəhətdən doğru və insanları gücləndirməyə yönəlmiş qərarlarla mümkündür.

“Patriarxın bugünkü çıxışından sonra mən daha bir dəfə özümü bu ölkədə ikinci dərəcəli hiss etdim və düşünürəm ki, sən demə bu ölkədə təhlükəyəm və ölkədə başqa xalqlar içində hesab olunuram və ölkə yalnız gürcülərindir. Demoqrafik problemlərə qayğı belə bəyanatlarla olmur. Sevgi ilə, birliklə, həm özünün, həm də başqasının dinlərinin sevgisi ilə və ölkənin iqtisadi problemlərinin həlli ilə olur. Belə bəyanatlar ölkənin etnik mənsubiyyəti və inancı ilə fərqlənən vətəndaşlarına qarşı çox böyük risklər yaradır. Ölkədən camaat qaçır və iqtisadi problemlərə görə camaatın uşaq saxlamaq qorxusu var. Əgər dövlət bu problemləri həll edərsə, heç bir xristian gürcü bir və ya iki uşaqla kifayətlənməz, buna 100% əminəm!” – Ceyhun qeyd edib.


“Lelo – Güclü Gürcüstan” partiyasının Marneuli rayon təşkilatının rəhbəri Aqil Mustafayevin bəyanatına görə, Gürcüstanın Patriarxı tərəfindən edilmiş bəyanat cəmiyyətdə soyuqluq, inciklik və etibarsızlıq yarada bilər. Mustafayevin sözlərinə görə, Gürcüstanın etnik azərbaycanlı vətəndaşları özlərini Gürcüstanın bir hissəsi hesab edir və özlərini "əcnəbi" hesab etmirlər.

“Mən hər hansı bir millətin və ya dini icmanın inkişafını təhlükə kimi təqdim edən fikirlərdən çox narahatam. Çünki biz bu ölkədə heç vaxt özümüzü əcnəbi hesab etməmişik. Tarix boyu Gürcüstanın gücü müxtəlif millətlər və dinlər arasında qarşılıqlı hörmət və qardaşlıq şəraitində olub. Azərbaycanlılar, gürcülər, ermənilər, müsəlmanlar, xristianlar, hamımız bu ölkənin vətəndaşlarıyıq və hamımız onun sabitliyi, inkişafı və təhlükəsizliyi üçün çalışırıq. Biz Gürcüstandakı hər bir vətəndaşın, hər bir ailənin güclü, sabit və təhlükəsiz olmasını istəyirik. Bu ölkədə yaşayan hər bir insanın rifahı bizim üçün eyni dərəcədə vacibdir. Cəmiyyətin inkişafı və demoqrafik dəyişikliklər qorxu ilə deyil, düzgün sosial və iqtisadi siyasətlə qiymətləndirilməlidir. Hər hansı bir millətin və ya icmanın mövcudluğu və böyüməsi təhlükə yaratmır, əksinə, bu dövlətin canlılığının, inkişafının və davamlı gücünün göstəricisidir. Gürcüstanın əsl gücü onun müxtəlifliyini qorxutmaqda deyil, bu müxtəlifliyi ədalət, hörmət və bərabərlik prinsipləri əsasında birləşdirməkdədir”, – Aqil Mustafayev yazıb.


Patriarx III Şionun bəyanatına hüquq müdafiəçisi Samirə Bayramova da reaksiya verib. O, ölkədə doğum sayını azaldan iqtisadi və sosial problemləri vurğulayır. Bayramovanın yazdığına görə, ölkədə gürcü uşaqlar yaşamaq üçün mübarizə aparırlar və dərman tələb edirlər. Hər il minlərlə insan yalnız ona görə ölür ki, tam tibbi xidmət mövcud deyil, ayrıca hər il yüzlərlə insan qəzalarda ölür. Bayramova ailələrin parçalanmasından da danışır və bəyan edir ki, uşaqların əksəriyyəti anasız və ya atasız böyüyür, çünki valideynlərə xaricə işləməyə getmək məcburiyyəti yaranır.

“Bizim ölkəmizdə insanların bir-birini etnik mənsubiyyətinə görə ayırması çox ağrılıdır. Gürcüstanda istər azərbaycanlı olsun, istər erməni, istər kist və ya digər etnik qrupun nümayəndəsi – hamı bir ölkənin övladıdır, hamı Gürcüstan vətəndaşıdır. Sən demə “kimlərsə çoxalır, gürcülər yox” – deyəndə, bu yalnız səhv deyil, həmçinin də ayıbdır. Reallıq odur ki, demək olar ki, bütün azlıqların ailəsində 2 uşaqdır, maksimum 3 və o da çox vaxt yalnız o zaman, ki ailənin oğlan uşağı yoxdur, o zaman olur. Bu, ümumi sosial və iqtisadi vəziyyətin nəticəsidir və hər hansı bir etnosun “təqsiri” deyil. İkinci İlia məhz buna görə bütün millətləri sevirdi ki, bu, bir-birimizi bölünmə ilə deyil, birliklə necə görməli olduğumuzun nümunəsi idi”, – Samirə Bayramova paylaşımda bildirib.


Patriarxın bəyanatına mülki fəal Naşir Orduxanov da reaksiya verib və deyir ki, Gürcüstan patriarxından bənzər bəyanatların eşidilməsi xoş deyildi.

“Gürcüstanın yeni seçilmiş patriarxının Gürcüstanda "başqa millətlərin çoxalması" ilə bağlanan bəyanatına münasibət bildirmək istəyirəm. Qeyd etmək istəyirəm ki, mən də sözdə "başqa millətin nümayəndəsiyəm" və Gürcüstan patriarxından bənzər bəyanatın eşidilməsi xoş deyildi. Biz əvvəlki patriarx cənab İkinci İlianın vaxtında belə bəyanatlar eşitmirdik, əksinə, o, hər zaman bərabərliyi və başqa millətlərə qarşı hörməti vurğulayırdı. Mən düşünürəm ki, Gürcüstanda əsas problemi "başqa millətlərin çoxalması" deyil, ölkədə vicdansız insanların, pedofillərin, irqçilərin, faşistlərin, fırıldaqçıların, kriminalların və s. çoxalması təşkil edir. Müvafiq olaraq biz, patriarx, imamlar, cəmiyyət, hakimiyyət, möminlər və xalq hamımız birlikdə əl tutmalı və hər şeyi etməliyik ki, bu ölkədə "konkret millətin nümayəndələri" deyil, "vicdanlı insanların" sayı çoxalsın”, – Naşir Orduxanov yazıb.


17 may Beynəlxalq Homofobiya və Transfobiyaya Qarşı Mübarizə Günüdür. 2013-cü ildən Gürcüstan Pravoslav Kilsəsi 17 mayda Ailə Müqəddəsliyi Gününü qeyd edir. Ailə Müqəddəsliyi Günündə xütbə zamanı Gürcüstanın Patriarxı III Şio demoqrafik problemlərdən danışıb. O, həmçinin bəyan edib ki, “ailənin xilası üçün, ailə dəyərlərinin qorunması üçün işləməli, çalışmalıyıq, elə bir qanunvericiliyə malik olmalıyıq ki, hansı ki ailəni, bizim xalqı zərərli gender nəzəriyyələrindən, ideologiyasından qoruyacaq. Bu qanunvericilikdən imtina etməli deyilik, necə ki bəziləri bizə çağırış edir, əksinə, bu istiqaməti, ailənin qorunması və saxlanmasını gücləndirməli və möhkəmləndirməliyik”.

Patriarxın bəyanatını qadın hüquq müdafiəçiləri də problemli kimi qiymətləndirirlər. Onların sözlərinə görə, patriarxın bəyanatı abortların qadağan edilməsinə aiddir, hansı ki, qadınların hüquqi vəziyyətini əhəmiyyətli dərəcədə pisləşdirəcək.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.