Hökumət Administrasiyasında keçirilən brifinqdə İrakli Kobaxidzedən soruşulub ki, əgər Patriarxlıq Duşenn əzələ distrofiyasından əziyyət çəkən uşaqların ailələrinə yardım göstərilməsi ilə bağlı hökumətə müraciət etsə, bu məsələni yenidən nəzərdən keçirməyə hazırdırlarmı.

Bu gün saat 15:00-da Patriarx Şio III Duşen xəstəliyindən əziyyət çəkən uşaqların ailələri ilə görüşüb.

Kobaxidze bildirib ki, kilsənin istənilən mövqeyi onlar üçün önəmlidir, lakin hökumətin bu gün bu məsələ ilə bağlı konkret mövqeyi var.

Kobaxidzenin sözlərinə görə, dərmanların alınması üçün ayrılacaq vəsait vergi ödəyicilərinin büdcəyə ödədiyi pullardan ayrılmalıdır və hökumət xalqın pulunun rasional xərclənməsinə görə məsuliyyət daşıyır.
“Haqqında danışılan məbləğ – istər 50 milyon olsun, istər 60 milyon – bizim şəxsi cibimizdən verəcəyimiz pul deyil. Bu, vergi ödəyicilərinin vəsaitidir, xalqın puludur. Bizim praqmatik xərcləmə məsələsində ehtiyatlı olmağımızın yeganə səbəbi gürcü xalqı qarşısında, vergi ödəyiciləri qarşısında daşıdığımız məsuliyyətdir.
Bizim üçün ən asanı bu 50 milyon manatı götürüb xərcləmək olardı. Bu, siyasi baxımdan bizim üçün ən sərfəli çıxış yolu olardı. Lakin digər tərəfdə hökumətin, büdcəyə xalqın ödədiyi vəsaiti rasional şəkildə xərcləmək öhdəliyi dayanır.
Söhbət kifayət qədər böyük məbləğdən gedir – təxminən 50 milyon, hansı ki, hər il xərclənməlidir. Burada sadə bir sual verilməlidir: bu vəsait rasional şəkildə xərclənə bilərmi və bu xərcləmə nəticə verəcəkmi, yoxsa bu pulla sadəcə farmasevtik mafiyanı zənginləşdirəcəyik? Bu suala cavab verilməlidir – həqiqət haradadır?
Əgər əmin olsaq ki, bu böyük məbləğlə real və hiss olunan nəticə əldə etmək mümkündür, onda başqa məsələdir. Amma əgər hiss etsək ki, bu pul yalnız farmasevtik mafiyanın zənginləşməsinə xidmət edə bilər, bu halda müvafiq qərarı qəbul etmək bizim üçün çətin olacaq”, – deyə Kobaxidze bildirib.

Onun iddiasına görə, Gürcüstanda əvvəllər də hökumətin asan yolu seçdiyi və milyonlarla vəsait xərclədiyi, lakin nəticə əldə olunmadığı hallar olub.

“Gürcüstanda elə hallar olub ki, hakimiyyət asan çıxış yolunu seçməyə çalışıb və illərlə buna xalqın milyonlarla pulu sərf olunub, amma gözəçarpan nəticə əldə edilməyib.
Hansı sahədən danışdığımı konkretləşdirmək istəmirəm. Vaxtilə hökumət xalqın və cəmiyyətin bir hissəsinin təzyiqi altında müəyyən qərar qəbul etdi və on milyonlarla vəsait nəticə verməyən bir istiqamətə xərcləndi.
Əgər hökumət bu yolla davam etsə, farmasevtik mafiyanın yeni-yeni təşəbbüsləri ortaya çıxa bilər. Bu təşəbbüslər də yenə heç bir nəticə vermədən yalnız farmasevtik mafiyanın zənginləşməsinə xidmət edə bilər və nəticədə bu məbləğin illik həcmi hətta 1 milyard lariyə qədər çata bilər. Əgər farmasevtik mafiya dövlətin və hökumətin zəifliyini görsə, bu vəsaitin həcmi milyard lariyə qədər yüksələ bilər.”
Kobaxidze vurğulayıb ki, bu, hökumət üzvlərinin şəxsi pulu deyil:
“Bu bizim pulumuz deyil. Mən şəxsən bu vəsaiti verməklə heç nə itirmirəm. Əksinə, sabah elan etsəm ki, bu və ya başqa məsələ üçün 50 milyon, 100 milyon ayırırıq, bu siyasi baxımdan mənə yalnız əlavə xal qazandırardı. Amma hökumət xalqın büdcəyə ödədiyi vəsaiti rasional şəkildə xərcləməlidir.
Təsəvvür edin, elə dərman var ki, qiyməti məsələn 3 milyon dollar, başqa bir dərman isə 700 min dollardır. Halbuki bu dərmanların maya dəyəri maksimum 300–700 dollardır. Siz təsəvvür edə bilərsinizmi, burada hansı miqyasda mafiya fəaliyyət göstərir? Bu, adi mafiyadır. Əsas odur ki, mafiyanın təşəbbüslərinə uymayaq və rasional qərarlar qəbul edək.”

Bununla yanaşı, Kobaxidze bildirib ki, hökumət valideynlərin vəziyyətini tam anlayır:
“Biz valideynlərin vəziyyətini tam şəkildə anlayırıq. Onların mövqeyi tamamilə başadüşüləndir. Farmasevtik mafiyaya dair bu riskləri nəzərə alaraq bəzi təşəbbüslər bizim üçün nə qədər qəbuledilməz olsa da, hər halda valideynlərin vəziyyətini anlamalıyıq.
Bu səbəbdən də nazirlikdə valideynlərlə məsləhətləşmələr aparılıb. Məsləhətləşmələr bütün formatlarda davam etməlidir. Rasional qərarlara görə məsuliyyət Səhiyyə Nazirliyinin üzərindədir. Biz məsləhətləşmələrə, o cümlədən kilsə nümayəndələri ilə dialoqa hazırıq”, – deyə Kobaxidze bildirib.

Valideynlərlə şəxsən görüşüb-görüşməyəcəyi ilə bağlı suala cavab olaraq isə Kobaxidze deyib ki, Səhiyyə Nazirliyində ekspert bilikləri mövcuddur və məsləhətləşmələrin orada davam etdirilməsi daha məqsədəuyğundur.

Mənbə: Publika

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

 

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.