Qızılhacılı əhalisinə təbii qazın verilişi bərpa olunacaq — SEMEK “Mamed” şirkətinə xüsusi idarəçi təyin etməyi planlaşdırır
​Marneuli bələdiyyəsinin Qızılhacılı kənd əhalisi üçün təbii qaz təchizatının bərpasına bu gündən başlanılacaq.
​Bu barədə Gürcüstan Milli Energetika və Su Təchizatı Tənzimləmə Komissiyası (SEMEK) məlumat yayıb.
​
Əhalinin maraqlarının qorunması və fasiləsiz qaz təchizatının təmin edilməsi məqsədilə SEMEK, kəndə təbii qazın verilişinin bərpa olunması üçün “SOCAR Gas Export-Import” MMC-yə rəsmi şəkildə məktubla müraciət edib.
​“Marneuli bələdiyyəsinin Qızılhacılı kənd əhalisinin maraqlarının qorunması və fasiləsiz qaz təchizatının təmin edilməsi məqsədilə SEMEK, “SOCAR Gas Export-Import” MMC-yə müraciət edib və kəndə təbii qazın verilişi bu gündən etibarən bərpa olunacaq. Komissiya həmçinin, gələcəkdə əhalinin təbii qazla fasiləsiz və etibarlı təminatını reallaşdırmaq üçün “Mamed” MMC-yə xüsusi idarəçinin təyin edilməsi məsələsinə baxır”, — deyə SEMEK-dən bildiriblər.

​SEMEK-dən verilən izahata görə, iyunun 9-da Qızılhacılı kənd əhalisinə təbii qazın verilişi qazpaylayıcı şirkət olan “MamedGaz” MMC-nin özbaşına və qanunsuz hərəkətləri səbəbindən dayandırılıb. “MamedGaz” şirkəti Qızılhacılıda qazın paylanmasını həyata keçirən lisenziyalı təbii qaz şirkətidir.

​Komissiyanın məlumatına görə, şirkət aylarla qanunvericiliklə nəzərdə tutulmuş öhdəliklərini yerinə yetirməyib və istehlakçılara verilən təbii qazın dəyərini “SOCAR Gas Export-Import” MMC-yə ödəməyib. Nəticədə şirkətin 600 min laridən çox borcu yaranıb. Şirkətə təbii qazın verilişi məhz qeyd olunan bu borca görə dayandırılıb.

​SEMEK-in bəyanatında qeyd olunur ki, Qızılhacılı kənd əhalisinin uzunmüddətli perspektivdə təbii qazla fasiləsiz və etibarlı təminatını zəmanət altına almaq üçün növbəti açıq iclasda “MamedGaz” MMC-yə xüsusi idarəçinin təyin edilməsi məsələsi müzakirə olunacaq.