Gürcüstanın Dövlət Təhlükəsizliyi Xidmətinin Rüşvətxorluqla Mübarizə Agentliyinin əməkdaşları hakimin qərarı əsasında

dələduzluq və saxtakarlıq ittihamı ilə iki şəxsi saxlayıblar.

Sözügedən məsələ Marneuli və Kareli bələdiyyələrinin uşaq bağçalarına aldatma yolu ilə mal əti əvəzinə at ətinin tədarük edilməsi faktı ilə bağlıdır.

İstintaq nəticəsində aydın olub ki, "B.G.M.1" və "Gürcü Ət Məhsulları Ferması" şirkətləri "Marneuli Bələdiyyəsinin Uşaq Bağçaları Birliyi" və "Kareli Bələdiyyəsinin Uşaq Bağçaları

Birliyi" tərəfindən elan edilmiş tenderlərin qalibi olublar. Müqavilənin şərtlərinə əsasən, həmin şirkətlər uşaq bağçalarını mal əti ilə təmin etməli idilər.

Ancaq adıçəkilən kommersiya təşkilatlarının direktorları 2026-cı ilin may ayında uşaq bağçalarına mal əti əvəzinə aldatma yolu ilə at əti paylayaraq dövlət büdcəsinə məxsus külli miqdarda vəsaiti dələduzluq yolu ilə mənimsəyiblər.

Faktla bağlı Gürcüstan Cinayət Məcəlləsinin 180-ci maddəsinin 3-cü hissəsinin "b" bəndi (dələduzluq) və 197-ci maddəsinin 1-ci hissəsi (saxtakarlıq) ilə istintaq aparılır. Bu maddələr 6 ildən 9 ilədək azadlıqdan məhrumetmə cəzasını nəzərdə tutur.