"Gürcü Arzusu" hökumətinin rəhbəri İrakli Kobaxidze Avqust müharibəsinin 18-ci ildönümündə Gürcüstanda "rusofobiya"dan konuşmaq üçün Hökumət Administrasiyasında brifinq keçirib.

O, 2008-ci ildə Rusiyanın Gürcüstanda başladığı müharibəni "Deep State" ilə əlaqələndirib və Rusiyanın Ukraynada başladığı müharibəyə "Gürcüstanın cəlb edilməsi" barədə növbəti dəfə danışıb.

Kobaxidze rusofobiya nümunələri kimi 2023-cü ildə rusiyalı turistlərin "Astoria Grande" kruiz gəmisi ilə gəlişini və "Qvareli Gölü" mehmanxanasında Rusiya vətəndaşlarının toyu zamanı müxalifətçi Elene Xoştariyanın aksiyasını göstərib. Həmin gün orada Rusiya xarici işlər naziri Sergey Lavrovun qızı Yekaterina Lavrova həyat yoldaşı Aleksandr Vinokurovla birlikdə idi. Mehmanxanada Lavrovanın qaynının toyu keçirilməli idi.

Rusiya Gürcüstan ərazisinin 20%-ni işğal altında saxlayır — son müharibə 2008-ci ildə başlayıb və Rusiya Abxaziya ilə Tsxinval regionunun "müstəqilliyini" elan edib. Avqust müharibəsindən bu il 18 il ötür.

"Biz ehtiyatlı olmalıyıq... Ehtiyatlı olmalıyıq, əgər hərəkət etməsək, uğur qazana bilərlər", — deyə o bildirib və əlavə edib ki, bu kampaniya nəticə verməyib və rusiyalı turist axını azalmayıb.

"Xaricdəki tərəfdaşlar, daxildəki agentura — hamı birlikdə ölkəmizdə bu kampaniyanı alovlandırmağa çalışır. Bunun yeganə məqsədi var: onlar 'ikinci cəbhə' açılmasına nail ola bilmədilər — əvvəllər də belə idi, 2022-ci ildə bizə gəlib ikinci cəbhə açmağı tələb edəndə rədd cavabı aldılar. Sonra daha dolayısı tələblərə keçdilər — bu, sanksiyaların tətbiqi, döyüşçü könüllülərin göndərilməsi idi. Bunlarla da nəticə qazana bilmədikdə, şantaj üçün istifadə etməyə çalışdıqları Aİ məsələsi gəldi. Bunu da istifadə edə bilmədilər, çünki cəmiyyət müdriklik nümayiş etdirdi. Bunun ardınca üç rusofob kampaniya gətirdilər...

Bu kampaniya birbaşa turistlərə qarşı yönəlmişdi. Rusiyalı turisti təhlükə kimi qələmə verirdilər... Bunu alovlandıra bilmədilər, çünki ksenofobiya kimi rusofobiya da Gürcü mədəniyyətinə yaddır...", — deyə İrakli Kobaxidze hökumətyönlü "Imedi" kanalının jurnalistinin sualını cavablandırarkən bildirib.

Bir neçə gündür ki, hökumətyönlü kanallar və "Gürcü Arzusu"nun liderləri "rusofobiya"nın təşviq edilməsindən danışırlar — mövcud hakimiyyətin siyasətini tənqid edən, lakin 2008-ci il müharibəsindən sonra Rusiyada tədbir keçirən sənətçilər haqqında süjetlər hazırlanır.

"Təbii ki, onların bu emosiyaları da tamamilə saxtadır, çünki xarici agentura hər cür dəyərlərdən məhrumdur və bunu bu günə qədər dəfələrlə sübut ediblər. Lakin məntiqi sual yaranır — nə üçün onlar məsələ Gürcüstana aid olanda yox, məhz indi rusofoblaşdılar?", — deyə İrakli Kobaxidze avqustun 4-də "Facebook"da yazıb.

"Gürcü Arzusu" hökuməti 2008-ci il avqust müharibəsinin başlanma tarixi kimi 8 avqustu qəbul edir və MuXatqverdi Qardaşlıq Qəbiristanlığındakı Qəhrəmanlar memorialını da 8 avqustda ziyaret edir. Müharibənin 18-ci ildönümündə də eyni hal yaşanıb. Partiya liderləri və dövlət strukturlarının rəhbərləri avqustun 8-də müharibədə həlak olanların memorialına çiçəklər qoyub, qəhrəmanların ailə üzvləri ilə görüşüblər. Avqustun 7-də isə müxalifət partiyalarının nümayəndələri xatirəni yad etmək üçün memoriala yollanıblar.

"Gürcü Arzusu"nun liderləri siyasi bəyanatlarında müharibənin başlanmasında növbəti dəfə "Vahid Milli Hərəkatı" günahlandırıblar.

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---