2020-ci ildə koronavirus pandemiyasının başlaması ilə Azərbaycan quru sərhədlərini bağladı və bu qadağa bu günə qədər qüvvədə qalır. İllərdir iki ölkə arasında gediş-gəliş yalnız yüksək qiymətlərlə fəaliyyət göstərən aviaşirkətlərin uçuşları ilə mümkün idi.

Son zamanlar isə Tiflis-Bakı marşrutu üzrə qatar reysləri bərpa olunsa da, biletlərin sayı məhduddur və tapılması son dərəcə çətindir.

Gürcüstanda yaşayan çoxsaylı soydaşlarımız üçün qatar həm uçuş qorxusundan azad olmaq, həm də daha əlçatan nəqliyyat vasitəsi idi. Lakin bilet qıtlığından istifadə edən dələduzlar vətəndaşları tələyə salaraq qanunsuz gəlir əldə etmək xəyalına düşüblər.

Mümkün bilet tələsinə düşənlərdən biri də Marneulili siyasətçi, "Vahid Milli Hərəkat" partiyasının üzvü Nərgiz Əliyevadır.



Bilet axtarışından dələduzluq qurbanına:
Nərgiz Əliyeva avqust ayı üçün Tiflis-Bakı qatarına bilet axtararkən rəsmi və turizm şirkətlərində yer tapılmadığını bildirir. Sosial şəbəkələrdə "Georgian Air" adlı səhifəyə rast gələn siyasətçi onlarla əlaqə saxlayıb.

"Mənə dedilər ki, istədiyiniz tarixlərə bilet var və WhatsApp nömrəsi təqdim etdilər. Təbii ki, ödənişi əvvəlcədən etmək istəmirdim. Dedim ki, sizə necə etibar edə bilərəm? Dedilər ki, onda Qardabani rayonunun Qabal kəndindəki ofisimizə yaxınlaşın. Təbii ki, bilirdilər ki, mən fiziki olaraq ora gedə bilməyəcəm. Sonra mənə hesab nömrəsi göndərəcəklərini, ödənişdən sonra bileti PDF formasında atacaqlarını dedilər."

Siyasətçi başının işə qarışıq olmasından və qarşı tərəfin onu tanıdığını bildirməsindən istifadə olunaraq inamının qazanıldığını vurğulayır. Hesab nömrəsi göndərilərkən şəxsiyyət vəsiqəsi təqdim edilib, lakin həmin sənəd Bolnisi sakininə aid olub. Pulu köçürdükdən iki saat sonra biletini soruşan Əliyeva cavab ala bilməyib, zəng etdikdə isə nömrənin deaktiv edildiyini və sosial şəbəkələrdə bloklandığını görüb.

Nərgiz Əliyeva həmin şəxsin kimliyini müəyyənləşdirmək üçün onun fotosunu paylaşıb və Faxralıdan olan dostlarının köməyi ilə dərhal şəxsiyyət vəsiqəsinin sahibinin koordinatlarını əldə edərək onunla əlaqə saxlayıb.

"Hər zaman ehtiyatlı olan, heç kimə asanlıqla etibar etməyən bir insan kimi həyatımda ilk dəfə dələduzluq qurbanı oldum. Biletin pulu mənim üçün önəmli deyil, əsas məsələ başqalarının bu tələyə düşməməsidir."


Dələduzluq sxemi necə işləyir?

Nərgiz Əliyevanın apardığı şəxsi araşdırma və polisə müraciətindən sonra bu cinayətkar şəbəkənin mexanizmi bəlli olub:

Gənc və saf vətəndaşların tələyə salınması: Dələduzlar TikTok və ya digər platformalarda "hesab nömrəsini təqdim edənə ayda 100 lari mükafat" kimi saxta elanlar paylaşırlar.

Məxfi məlumatların ələ keçirilməsi: Şəxsi məlumat şüuru aşağı olan gənclərdən şəxsiyyət vəsiqəsi, bank hesab nömrəsi və hətta İnternet Bankinq məlumatları (login/parol) alınır.

Qurbanlardan pulun toplanması: Bilet və ya digər xidmət adı ilə aldadılan vətəndaşlar ödənişi bu günahsız üçüncü şəxslərin (məsələn, həmin Bolnisi sakininin) hesabına köçürürlər.

Pulun izinin itirilməsi (Yuyulması): Hesaba daxil olan vəsait dərhal bukmeyker (məsələn, AdjaraBet), TikTok, Google və ya saxta profillərə köçürülərək nağdlaşdırılır və izi itirilir.

Polisə müraciət və cəmiyyətə çağırış

Nərgiz Əliyeva dərhal Marneuli Polis Şöbəsinə müraciət edərək ərizə yazıb. Məsələ ilə bağlı istintaq başlayıb və hesabı istifadə olunan gənc də ailəsi ilə birgə polisə çağırılaraq dindirilib, ifadəsi alınıb.



Siyasətçi vətəndaşlara və xüsusilə gənclərə müraciət edərək xəbərdarlıq edir:

"Gənclərimizə səslənirəm! heç bir halda şəxsi məlumatlarınızı, bank hesablarınızı və parolunuzu tanımadığınız insanlara verməyin. Göydən asan pul düşmür! Aldadılan bütün vətəndaşları isə məbləğ az da olsa, mütləq hüquq-mühafizə orqanlarına müraciət etməyə və məsələni ictimailəşdirməyə çağırıram. Bu gün susarsaq, sabah başqa

soydaşlarımız da bu insafsızların qurbanı olacaq."

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---