Nepalda qəfil daşqından bir həftə keçir, minlərlə itkin şəxsin sağ tapılacağına ümid azalır. Daşqına Himalay dağlarında buzlağın uçması səbəb olmuşdu.

Rəsmi məlumata görə, azı 1 min 114 nəfər həlak olub, 4 minə yaxın insan hələ də itkin sayılır. Onların çoxunun daşqının gətirdiyi dağıntılar altında qaldığı güman edilir.

Daşqın Çinlə sərhəd yaxınlığındakı şəhərləri və vadiləri dağıdıb.

Çin hakimiyyətinin açıqladığı son məlumata görə, Tibetdə 16 nəfər ölüb, 546 nəfər itkin düşüb.

Nepal hökumətinin rəsmisi Fanindra Paudel bildirib ki, sağ qalanların tapılması ehtimalı getdikcə azalır.

Xilasedicilər su elektrik stansiyalarının tunellərində sağ qalanların ola biləcəyinə ümid edirlər. Ordunun sözçüsü deyib ki, bu stansiyaların yeraltı hissələrində insanların sığına biləcəyi otaqlar və boş sahələr var.

İndiyədək su elektrik layihələrinin dağıntıları arasından 279 nəfər xilas edilib, azı 639 nəfər hələ də itkin sayılır. Onlardan bəzilərinin tunellərdə qaldığı güman edilir.

Xilasetmə əməliyyatlarına Hindistan, Çin və ABŞ-dən xüsusi qruplar da qoşulub.

BMT-nin yüksək vəzifəli rəsmilərindən biri deyib ki, Himalay regionunda gələcəkdə də buzlaq daşqınları baş verə bilər.

Nepalın baş naziri Balendra Şah bildirib ki, buz və qaya kütləsinin niyə uçduğu, belə böyük həcmdə suyun necə yarandığı beynəlxalq səviyyədə araşdırılmalıdır.

Çin də daşqını iqlim dəyişikliyi ilə əlaqələndirib.

"Üstümüzə nəhəng palçıq axını gəlirdi"
"Reuters" yazır ki, həqiqiliyi təsdiqlənmiş videolarda nəhəng su və dağıntı kütləsinin onlarla insanı apardığı görünür. Sel Nepalda evləri, yolları və enerji infrastrukturu obyektlərini də yuyub aparıb.

"Birbaşa üstümüzə nəhəng palçıq axını gəlirdi", — Nepalda xəstəxanada müalicə olunan 68 yaşlı Keşav Prasad Baral deyib.

Dörd saat sonra helikopter Baralı təhlükəsiz yerə çatdırıb. "Həyat yoldaşım hələ də palçığın altındadır. O, artıq yoxdur", – o əlavə edib.

Daşqından sağ çıxan başqa bir nəfər deyib ki, manqo ağacından yapışaraq xilas olub, işlədiyi ev gözünün qabağındaca yoxa çıxıb.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.