BMT-nin faktaraşdırıcı missiyası İranı ölkə vətəndaşlarının xarici şəxslər və qurumlarla əlaqələrini cinayət sayacaq qanun layihəsini qəbul etməməyə çağırıb.

Sənəd "Xarici təsirə qarşı mübarizə haqqında" qanun layihəsi kimi tanınır. BMT ekspertlərinin sözlərinə görə, məqsəd iranlılarla xarici subyektlər arasında əlaqələri tənzimləməkdir.

BMT-nin İran üzrə Müstəqil Faktaraşdırıcı Missiyası xəbərdarlıq edib ki, sənədin qəbulu əsas azadlıqları sarsıda bilər.

"Layihənin qəbulu əsas azadlıqların repressiyasının güclənməsi, iranlıların beynəlxalq ictimaiyyətdən təcrid olunması yönündə təhlükəli addım ola bilər", - qurum qeyd edir.

Missiyanın məlumatına görə, qanun layihəsi akademik əməkdaşlığı, nəşr fəaliyyətini, xarici media ilə əlaqələri, beynəlxalq konfranslarda iştirakı əhatə edəcək. Müəyyən kommersiya və maliyyə əməliyyatları da buraya daxil olacaq.

Layihə qanun kimi qəbul olunarsa, jurnalistlər, alimlər, fəallar və digər şəxslər xarici qurumlarla əlaqələrinə görə 30 ilədək həbs cəzası ilə üzləşə bilərlər.

"İran hökumətinin adi iranlıların xarici dünya ilə istənilən əlaqəsini bütövlükdə cinayət hesab etməyə yönələn addımları bizi dəhşətə gətirir", – üç üzvdən ibarət missiyanın sədri Sara Hüseyn deyib.

BMT-nin İranda insan hüquqları üzrə xüsusi məruzəçisi May Sato da qanun layihəsinin geri götürülməsi ilə bağlı missiyanın çağırışını dəstəkləyib.

17 avqust
İranda xarici media ilə ünsiyyətə görə cinayət məsuliyyəti gəlir
İran parlamenti hakimiyyətin düşmən saydığı media qurumları ilə ünsiyyətə görə cinayət məsuliyyəti nəzərdə tutan qanun layihəsini təsdiqləyib. Söhbət ABŞ və İsraildə qeydiyyatdan keçmiş və ya bu ölkələrdən maliyyə alan media qurumlarından gedir. “Reuters” bu məlumatı İranın “Şərq” nəşrinə istinadla yayıb.

Qanun layihəsini Mühaffizlər Şurası rəsmən təsdiqləməlidir. Sənəddə “düşmən” media qurumlarına müsahibə verməyə görə iki ilədək həbs cəzası nəzərdə tutulur.

Layihədə İran vətəndaşlarının digər xarici media qurumları ilə ünsiyyət imkanları da məhdudlaşdırılır. Xarici mediadan müsahibə təklifi barədə Təhlükəsizlik Nazirliyinə məlumat vermək tələb olunacaq. Xarici səfirliklər və xarici qurum nümayəndəlikləri ilə ünsiyyət üçün İran Xarici İşlər Nazirliyindən icazə almaq lazım gələcək. Bu qaydanın pozulması cərimələrə və digər cəzalara səbəb olacaq. Sənəddə xarici ölkələr və qurumlarla biznes və ya elmi əməkdaşlıq qaydalarının sərtləşdirilməsini nəzərdə tutur.

İranda “düşmən dövlətlər”lə əməkdaşlıq qadağandır, bu qanun layihəsi həmin qaydaları daha da sərtləşdirir.

İranlı fotojurnalist Yəlda Moayeri bu yaxınlarda qiyabi olaraq 15 il həbs cəzasına məhkum edilib. O, xarici mediaya müsahibələr verməsi, onlara ABŞ və İsrailin İrana zərbələrinin nəticələrini əks etdirən fotolar göndərməsi ilə əlaqədar “sionist rejim və ABŞ-nin maraqları naminə fəaliyyət göstərmək”də ittiham olunub.

İddia olunan pozuntuları Təhlükəsizlik Nazirliyi və İslam İnqilabı Keşikçiləri Korpusunun (SEPAH) kəşfiyyat strukturu araşdıracaq.

İran müstəqil jurnalistika və informasiyaya çıxış onsuz da sərt şəkildə məhdudlaşdırıb. “Sərhədsiz Reportyorlar” təşkilatının 2026-cı il Dünya Mətbuat Azadlığı İndeksində İran 180 ölkə arasında 177-ci yerdədir. Təşkilat İranda jurnalistlərin həbsini, izlənilməsini, təzyiqlərə məruz qalmasını, senzura və jurnalistlərə verilən ağır həbs cəzalarını səbəblər kimi sadalayır.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.