Ukrayna parlamenti sentyabrın 15-də ölkənin baş prokurorunun istefasını təsdiqləyib. Ruslan Kravçenko istefa ərizəsi təqdim edəndən sonra prezident Volodimir Zelenski onun tez bir zamanda vəzifəsindən kənarlaşdırılmasını tələb etmişdi.

Səsvermədən əvvəl Kravçenko sosial media paylaşımında parlamentin istənilən qərarını qəbul edəcəyini bildirib. O əlavə edib ki, belə bir addım “parlamentin özünün qərarı olmalıdır. Prezidentin əmri, parlament "rəhbərinin" tələbi, anti-korrupsiya qurumları rəhbərlərinin isterik tələbi olmamalıdır. Onlar və onların yaxın ətrafı korrupsiya əməllərinə bulaşıblar. Ən vacibi, (bu qərar) bu gün müşahidə etdiyimiz siyasi və media təzyiqinin nəticəsi olmamalıdır”.

Ukraynanın baş prokuroru NABU rəhbərini ittiham edib və ölkədən çıxıb
Ukraynanın baş prokuroru Ruslan Kravçenko Ukrayna Milli Antikorrupsiya Bürosunun (NABU) direktoru Semen Krivonosu rəsmən şübhəli şəxs elan edib. Baş prokuror bu barədə sentyabrın 14-də səhər saatlarında özünün Telegram-kanalındakı videomüraciətində məlumat verib. Hadisədən qısa müddət sonra Kravçenkonun ölkəni tərk etdiyi məlum olub.

Kravçenko ötən həftə istefa ərizəsi təqdim edib. Bu, NABU və Xüsusi Antikorrupsiya Prokurorluğunun (SAP) keçirdiyi səs-küylü "Karfagen" əməliyyatı fonunda baş verib. NABU həmin vaxt prokurorluq daxilində cinayətkar qruplaşmanın ifşa olunduğunu bildirmişdi. Qurumun məlumatına görə, şəbəkə iştirakçıları dələduzluqla məşğul olan çağrı mərkəzlərini himayə edərək qanunsuz gəlir əldə edib və milyonlarla vəsaiti leqallaşdırıblar.

Sonradan bu iş üzrə Baş Prokurorluğun Beynəlxalq Əməkdaşlıq Departamentinin rəhbər müavini Sergiy Kropiva və Elizaveta İvaxnenko həbs ediliblər.

Kravçenkonun iddiaları
Kravçenko iddia edir ki, "Karfagen" əməliyyatının məqsədi NABU və SAP rəhbərliyi, eləcə də əməkdaşları ilə bağlı materialları ələ keçirmək olub və həmin sənədlərin bir hissəsi sonucda "oğurlanıb".

"Əsassız danışmamaq üçün toplanmış sübutlar əsasında NABU-nun direktoru Krivonosu rəsmən şübhəli şəxs elan edən sənədə qol çəkdim. Mən onu qanunsuz gəlir əldə etmək məqsədilə rəsmi sənədləri saxtalaşdırmaqda və saxta övladlığa götürmədə şübhəli bilirəm", – "Hromadske" Kravçenkonun bu sözlərini sitat gətirir.

Onun sözlərinə görə, iş üzrə ikinci şübhəli şəxs SAP rəhbəri Oleksandr Klimenkonun yaxınıdır.

Kravçenko həmçinin Ukrayna Ali Antikorrupsiya Məhkəməsinin rəhbərinə təsir göstərildiyini, ona qanunsuz qazanc təklif olunduğunu və səfərbərlikdən yayınmaqda köməklik göstərildiyini vurğulayıb.

Kravçenkonun iddiasına görə, indiyədək tədbir görməyib, çünki prezident Volodimir Zelenski, həmçinin NABU və SAP ona "mane olub. O bildirib ki, həmin qurumlar rəsmi ittiham irəli sürməmək qarşılığında ona toxunulmazlıq təklif ediblər.


NABU və SAP-ın bəyanatı
NABU və SAP isə bu açıqlamaları müstəqil antikorrupsiya orqanlarına qarşı sistemli hücumların davamı kimi qiymətləndirib.

"Bu hücum bu gün başlamayıb. Hələ ötən ilin yayında onun fəal mərhələsinə start verilib. Həmin vaxt əsas hədəflərdən biri NABU və SAP-ı Baş Prokurorluğa tabe etdirmək cəhdi idi", – bəyanatda vurğulanır.

Büro Krivonosa heç hansı bir şübhə bildirişinin rəsmən təqdim edilmədiyini açıqlayıb.

Zelenski isə bildirib ki, "bu baş prokurorun yalnız bir çıxış yolu var – vəzifəsindən uzaqlaşdırılmaq": "Ona məhz bunu dedim. Ukrayna bunun bütün səbəblərini gördü. Əgər o, bunu siyasi təzyiq hesab edirsə, qoy elə də desin. Deputatlardan onun dərhal vəzifədən uzaqlaşdırılmasını dəstəkləmələrini xahiş edirəm".

"Ukrainska pravda" hüquq-mühafizə orqanlarındakı mənbələrinə istinadla Kravçenkonun sentyabrın 14-nə keçən gecə xidməti avtomobillə ölkədən çıxdığını bildirib.

Sonradan Kravçenko ölkəni tərk etdiyini özü də təsdiqləyib. O, xaricə ezamiyyətə getdiyini və səfər çərçivəsində bir sıra rəsmi görüşlərinin planlaşdırıldığını deyib.

Kravçenko bildirib ki, beynəlxalq tərəfdaşları antikorrupsiya orqanları sistemindəki real vəziyyət, "bu qurumların nəzarətsiz şəkildə hakimiyyəti öz əllərinə almaq cəhdləri, eləcə də bunun Ukraynanın dövlət suverenliyi, qanunun aliliyi və demokratik institutları üçün yaratdığı risklər" barədə məlumatlandırmaq niyyətindədir.

Xatırlatma
Kravçenko ətrafındakı qalmaqal Zelenski hökumətinə kölgə salan korrupsiya ittihamları fonunda xüsusilə diqqət çəkir.

Zelenskinin administrasiya başçısı Andriy Yermak ötən il istefa verməyə məcbur olub. O, "Enerqoatom" dövlət nüvə enerjisi şirkətinin podratçılarından yüz milyonlarla dollar məbləğində "otkat" (rüşvət) alınması sxemi ilə bağlı araşdırma çərçivəsində saxlanılıb, sonradan 3 milyon dollarlıq girov qarşılığında sərbəst buraxılıb.

İyulda müdafiə naziri postundan uzaqlaşdırılan Mixaylo Fedorov müdafiə sektorundakı korrupsiyadan açıq və sərt şəkildə şikayətlənib. Bir çox müşahidəçi bunu Zelenskiyə açıq çağırış kimi qiymətləndirib. Fedorovla ciddi fikir ayrılığı yaşayan Ukrayna Silahlı Qüvvələri baş komandanı, general Oleksandr Sırski də vəzifəsindən uzaqlaşdırılıb.

Bu qalmaqallarda birbaşa Zelenskinin əli olduğuna dair heç bir iddia səsləndirilməyib. Daha əvvəl isə ədliyyə və energetika nazirləri istefaya göndərilib və ya vəzifələrindən azad ediliblər.

Zelenski iyulda hökumətin tərkibini tamamilə yeniləyib. O, Yuliya Sviridenkonu baş nazir postundan kənarlaşdırıb, yerinə "Naftoqaz" dövlət enerji şirkətinin rəhbəri Sergiy Koretskini təyin edib.

Zelenski ölkənin Vaşinqtondakı səfirini də dəyişib. Diplomata qarşı da korrupsiya iddiaları irəli sürülüb.

Qalmaqallar Zelenskinin nüfuzuna xələl gətirib. Son ictimai rəy sorğuları onun reytinqinin zəiflədiyini və bir sıra tanınmış xadimlərdən geridə qaldığını göstərir.

Ukrayna ordusunun keçmiş baş komandanı Valeri Zalujnı rəy sorğularında öndə gəlir. O, hazırda Ukraynanın Londondakı səfiri vəzifəsində çalışır.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.