10 kəndə içməli su verilib, bununla belə boruların dəyişdirilməsinə ehtiyac var
“Kürtlər, Algeti
və Kəpənəkçi inzibati ərazi vahidlərinə daxil olan kəndlərdə bir
neçə gün idi ki, əhaliyə içməli su verilmirdi. Bu gündən həmin
kəndlərə içməli suyun verilməsi bərpa
olunub”,
- bu
haqda bizimlə söhbəti zamanı “Marneuli Kənd Suları” MMC-nin
direktoru Nəbi Abdullayev məlumat verdi. Onun sözlərinə görə, Böyük
Muğanlı ərazisindən keçən boru xəttində iki metrə yaxın dəmir
boruda qəza baş vermişdi və buna görə də əhaliyə içməli suyun
verilməsi dayandırılmışdı.
“Artıq həmin kəndlərə içməli suyun verilməsi bərpa
olunub. Qəzanın baş verdiyi hissə artıq dəyişdirilib. İki gün
ərzində əməkdaşlarmız qəzanın aradan qaldırılması üçün çalışırdılar
və ötən gün işlər yekunlaşdı və içməli suyun verilməsi bərpa
olundu”, - Nəbi Abdullayev dedi.
Nəbi Abdullayevin sözlərinə görə, 14 km-lik boru xətti qəzalı
vəziyyətdədir və artıq meriya həmin layihə üzərində çalışır və
yaxın zamanlarda layihənin icrasına başlanılacaq. Bununla belə o,
boruların dəyişdirilməsinə nə zaman başlanılacağı barədə dəqiq
məlumatı olmadığını bildirdi.