“Xoşbəxtlik Era-da olmaqdır” – Era Teatrının yeni üzvü Huri Əsgərova
Birinci kanalın keçmiş
jurnalisti Huri Əsgərova “Era” teatrının yeni üzvü
olub.
Onun sözlərinə görə, bir müddət əvvəl teatrın təcrübə proqramında
iştirak edib, proqramı başa vurduqdan sonra isə müəyyən səbəblərdən
aktrisa olaraq teatrda fəaliyyətinə davam etməyib. O, deyir ki,
teatr sahəsi elə də asan deyil, lakin sevdiyi sahə olduğu üçün
aktrisalığın elə də çətin olmayacağını düşünür.
“Sözsüz ki, teatrda fəaliyyət göstərmək mənim üçün
çətin olacaq. Çünki, yetəri qədər təcrübəm yoxdur. Ancaq inanıram
ki, az bir müddətdən sonra çox sevdiyim dostum və eyni zamanda
teatrın bədii rəhbəri Anar Rafiqoğlu sayəsində istədiyim yerə
çatacağam”, – Huri Əsgərova dedi.
O, deyir ki, tamaşaçıların sevilən aktrisası olmaq üçün əlindən
gələni edəcək.
Nəyə görə “Era” teatrını seçməsi sualını isə Əsgərova belə
cavablandırdı.
“Era teatrı qısa müddət ərzində çox böyük uğurlara nail
olmuş gənc teatrdır. Eyni zamanda Era teatrı Azərbaycanlı gənclər
tərəfindən yaradılmış ilk teatrdır. Onun gələcək uğurlarında mənim
də payım olmasını istəyirəm. Sonda yenə Eranın bədii rəhbəri,
Anarın da dediyi kimi “Xoşbəxtlik Era-da olmaqdır”, –
deyə Huri Əsgərova bildirdi.
Qeyd edək ki, Huri Əsgərova Gürcüstanın Birinci kanalının
jurnalisti idi və o, qısa müddətdir ki, Birinci kanaldan ayrılıb və
“Era” teatrına üzv olub.