Azərbaycanın Gürcüstandakı səfiri Gürcüstanın təhsil naziri ilə görüşüb
Azərbaycanın Gürcüstandakı səfiri Faiq Quliyev Gürcüstanın Təhsil,
Elm, Mədəniyyət və İdman Naziri Mixeil Çxenkeli ilə görüşüb.
Görüşdə tərəflər ölkələr arasında elm, təhsil, mədəniyyət və idman
sahələrində əməkdaşlığın daha da genişləndirilməsi məsələlərini
müzakirə ediblər.
M.Çxenkeli Gürcüstan ilə Azərbaycanın sözügedən sahələrdə
reallaşdırdığı birgə layihələri müsbət qiymətləndirib.
Nazir bildirib ki, ali təhsil sahəsində əməkdaşlığın
dərinləşdirilməsi, birgə elmi araşdırmaların aparılması böyük
əhəmiyyət kəsb edir.
F.Quliyev Azərbaycanın Gürcüstan ilə bütün istiqamətlərdə, o
cümlədən humanitar sahədə əməkdaşlığın daha da dərinləşdirilməsində
maraqlı olduğunu vurğulayıb.
Diplomat elm və təhsil, mədəniyyət və idman sahələrində əlaqələrin
müsbət dinamikasının digər sahələrdə də əməkdaşlıq üçün geniş
imkanlar açdığını bildirib.
Görüşdə qarşılıqlı maraq doğuran digər məsələlər ətrafında da fikir
mübadiləsi aparılıb.