25 yanvar tarixində Azərbaycan Respublikasının Gürcüstandakı
Səfirliyinin təşəbbüsü ilə
“Azərbaycan və Gürcüstanın
azadlıq mübarizəsi: 20 Yanvar və 9 Aprel faciələrinin səbəbləri,
fəsadları və ortaq dəyərləri” adlı onlayn formatda görüş
keçirilib.
Bu barədə “Marneuli” radiosuna Azərbaycanın Gürcüstandakı
səfirliyindən məlumat verilib.
Məlumata görə, tədbirdə 15-ə qədər Gürcüstanlı ekspert iştirak
edib. Tədbir iştirakçılarına müraciət edən Azərbaycanın
Gürcüstandakı səfiri Faiq Quliyev Azərbaycan və Gürcüstanın tarixi
bağlılığı, o cümlədən xalqların taleyinə oxşar faciələrin nəsib
olunduğunu vurğulayaraq, “Qanlı Yanvar” hadisələrinin səbəbləri,
mahiyyəti və tarixi nəticələri barədə ətraflı məlumat verib.
Səfir Azərbaycan xalqına qarşı törədilən cinayətin siyasi və hüquqi
qiymətin verilməsində Heydər Əliyevin oynadığı rolunu xüsusilə qeyd
edib. Görüşdə Quliyev şəhidlərin qanı bahasında əldə edilmiş hər
iki ölkənin müstəqilliyi dövründə Azərbaycan və Gürcüstanın tarixi
mehriban qonşuluq münasibətlərinə sadiq qalaraq, onların strateji
tərəfdaşlıq səviyyəsinə qaldırdığı və bu tərəfdaşlığın sayəsində
Cənubi Qafqaz bölgəsinin yeni simasının yaradıldığını söyləyib.
Gürcüstanlı ekspertlər öz çıxışlarında ölkələrin keçmişdə və
hal-hazırda qarşılıqlı şəkildə bir-birini dəstəklədiyini
bildirərək, gələcəkdə də hər iki dövlətin və bütövlükdə bölgənin
maraqlarına xidmət edən bu strateji tərəfdaşlığın inkişaf
etdirilməsinin vacibliyi haqda söhbət açıblar.
Onlar Heydər Əliyev və Eduard Şevardnadzenin iki ölkənin
əlaqələrindəki rolundan danışaraq, bu gün də dövlət və hökumət
başçıları arasında sıx əməkdaşlığın davam etdiyini bildiriblər.
Bundan əlavə bir sıra gürcüstanlı ekspertlər Azərbaycan xalqının 44
günlük müharibədə əldə etdiyi qələbə münasibəti ilə təbrik
ediblər.
Tədbirin sonunda Azərbaycan və Gürcüstanın gələcəkdə də əlaqələrin
inkişaf etdirilməsinə dair əminlik ifadə olunub.