Bu gün, 26 yanvar tarixində Dini İşlər üzrə Dövlət Agentliyinin
sədri və nümayəndələri Bütün Gürcüstan Müsəlmanları İdarəsinin
əməkdaşları ilə görüş keçirib.
Bu barədə məlumatı Bütün Gürcüstan Müsəlmanları İdarəsi yayıb.
Məlumata görə, Dini İşlər üzrə Dövlət Agentliyinin sədri Zaza
Vaşaxmadze, Agentliyin sədr müavini Qoqa Ukleba və Agentliyin digər
əməkdaşları Bütün Gürcüstan Müsəlmanları İdarəsini Şərqi Gürcüstan
üzrə yeni seçilmiş müftisi Etibar Eminovu yeni vəzifəyə seçilməsi
münasibəti ilə təbrik ediblər və ona gələcək dini fəaliyyətlərində
uğurlar arzulayıblar.
Müfti də öz növbəsində qonaqlara təşəkkür edərək, gələcək planları
haqqında məlumat verib və qurumla əməkdaşlığın perspektivlərini
müzakirə ediblər.
Görüş zamanı agentliklə birgə həyata keçirilən layihələr də
dəyərləndirilib və ölkədəki mövcud dini problemlərin həlli yolları
müzakirə olunub.
Görüşdə Bütün Gürcüstan Müsəlmanları İdarəsinin şeyxi Hacı Ramin
İgidovda iştirak edib.
Qeyd edək ki, 21 dekabr tarixində Bütün Gürcüstan Müsəlmanları
İdarəsinin Şərqi Gürcüstan üzrə yeni müftisinin seçilməsi üçün
növbədənkənar seçkilər keçirilib. Keçirilən seçkilərdə Ali Dini
Şuranın tam tərkibinin qərarı ilə Şərqi Gürcüstan üzrə yeni Müfti
vəzifəsinə Etibar Eminov seçilib. O, bu vəzifəni 5 il müddətinə
icra edəcək. Etibar Eminov 1975-ci ildə Marneuli bələdiyyəsinin
Daştəpə kəndində anadan olub. O, Marneulinin Şulaver qəsəbəsindəki
rusdilli orta məktəbi bitirib. Dini təhsilini Türkiyə
Respublikasının İstanbul şəhərində Elim və Hizmət, İlahiyyat adlı
dini mətkəbdə alıb. Tədris dönəmində 1 il müddətində Suriyada
praktikada olub. Marneulinin Xuldərə kəndindəki məscidin imamı
vəzifəsində çalışıb. O, Sadaxlıda mədrəsə təsis edib və bu günədək
oraya rəhbərlik edir. O, həmçinin Marneuli Bələdiyyəsinin müftüsü
olub. 2016-cı ildən bu günədək müftünün Kvemo-Kartli bölgəsi üzrə
nümayəndəsi vəzifəsini icra edib.
Onu da əlavə edək ki, 26 sentyabr tarixində Yasin Əliyev səhhətində
yaranan problemə görə Bütün Gürcüstan Müsəlmanları İdarəsini Şərqi
Gürcüstan üzrə müfti vəzifəsindən istefa etmişdi.