Marneuli yerli özünüidarəsi beş kənddə daxili yollara çınqıl
tökülməsi və bir kəndə gedən yola beton qatının çəkilməsi üçün
“Amirani” MMC ilə 79 723 lari dəyərində iki sadələşdirilmiş
müqavilə bağlayıb.
Gürcüstan hökumətinin sərəncamına müvafiq olaraq bələdiyyələrin
kəndə dəstək proqramı çərçivəsində layihələrin həyata keçirilməsi
üçün sadələşdirilmiş qaydada müqavilə bağlamaq səlahiyyəti var.
Kəndlərdə daxili yollara çınqıl tökülməsi və beton yolun çəkilməsi
məhz kəndə dəstək proqramı çərçivəsində həyata keçirilir.
Birinci sadələşdirilmiş tenderə əsasən, bələdiyyə Beytarabçı,
Xuldərə və Qudro kəndlərində daxili yollara çınqıl tökmək üçün
“Amirani” MMC-yə 39 756 lari 54 tetri ödəyəcək. Beytarabçı kəndində
daxili yollara çınqıl tökülməsi üçün 15 122 lari ayrılıb. Xuldərə
kəndi üçün 15 121 lari, Qudro üçün isə 9 513 lari 54 tetri
ayrılıb.
Meriya ikinci sadələşdirilmiş müqaviləyə əsasən isə Canxoş kəndinə
gedən yola beton qatının çəkilməsi, Xancığazlı və Brdazor
kəndlərində daxili yollara çınqıl tökülməsi işləri üçün “Amirani”
MMC-yə 39 967 lari 20 tetri ödəyib. Canxoş kəndi üçün mərkəzi və
yerli büdcədən 19 226 lari ayrılıb, Xancığazlı kəndinə 11 260,
Brdazor kəndinə isə 9 480 lari ayrılıb.
Müqaviləyə görə, şirkət 60 gün ərzində öhdəliyini yerinə
yetirməlidir.