Merck antiinflamatuar həbləri 105 inkişaf etməkdə olan və yoxsul
ölkə üçün nisbətən münasib qiymətə istehsal olunacaq. Bu yaxınlarda
BMT-nin dəstəyi ilə dərman istehsal edən iyirmiyə yaxın şirkətlə
müvafiq saziş imzalanıb. Məlumatı “Reuters” yayıb.
Müqaviləyə əsasən, dərman şirkətləri həm Molnupiravir dərmanının
xammalını, həm də hazır dərmanın özünü hazırlayacaq. Merck
tərəfindən hazırlanmış Molnupiravir həbinin koronavirusa yoluxmuş
xəstələrdə xəstəxanaya yerləşdirilmə nisbətini azaltdığı məlumdur.
Bundan əlavə, son aylarda Böyük Britaniya, Avropa İttifaqı və ABŞ
vətəndaşlarına bu dərmandan istifadəyə icazə verilib.
İlkin olaraq dərman şirkətləri tezliklə Banqladeş, Çin, Misir,
Vyetnam, Keniya və Cənubi Afrika da daxil olmaqla 11 ölkədə Merck
həblərinin istehsalına başlayacaqlar.
Xatırladaq ki, insanların simptomları azaltmaq və sağalmanı
sürətləndirmək üçün qəbul edə biləcəyi antiviral həbi xəstəxanaya
yerləşdirilən koronavirusa yoluxmuş xəstələrin sayını azaltmaq və
bununla da xəstəliyin gedişatını yüngülləşdirmək potensialına
malikdir. Həmçinin, bu dərman covid ölüm nisbətlərini minimuma
endirir.
Bir sözlə, səhiyyə sistemi zəif olan yoxsul ölkələrə epidemiyanın
qarşısını almağa kömək edəcək.