İyulun 2-də Vano Saracişvili adına Tbilisi Dövlət
Konservatoriyasının böyük zalında Azərbaycan Dövlət Simfonik
Orkestrinin dirijoru, əməkdar artist Fuad İbrahimovun dirijorluğu
ilə konsert keçiriləcək.
Musiqi axşamında dirijorun idarəçiliyi altında Gia Kançeli adına
Tbilisi Gənclər Orkestrinin müşayiəti ilə Yunanıstandan olan
fleytaçalan Statis Karapanos çıxış edəcək.
Konsertin xüsusi qonağı qismində Ukrayna-Gürcüstan müğənnisi Sofi
Villi də ifalarını təqdim edəcək.
Axşamda Mika Mdinardzenin müəllifi olduğu “145/Xristos” əsərinin
premyerası olacaq. Həmçinin Azərbaycanın dahi bəstəkarı Fikrət
Əmirovun simli orkestr üçün “Nizaminin xatirəsinə” simfoniyası və
Otar Qordelinin fleyta üçün konsertinosu da səslənəcək.
Qeyd edək ki, 1947-ci ildə yazılan “Nizaminin xatirəsinə”
simfoniyası dahi şair və mütəffəkkir Nizami Gəncəviyə həsr
edilib.