Forbes.ru Rusiya Gömrük Xidmətinə istinadən xəbər verir ki,
sentyabrın 22-si səhər saat 06:00-a Zemo Larsi keçid məntəqəsində
Rusiyadan Gürcüstana 1511 yüngül avtomobil daxil olub.
Məlumata görə, Putinin səfərbərlik elan etməsindən bir gün əvvəl
Rusiyadan Gürcüstana daxil olan avtomobillərin sayı 1261 olub, bu
isə o deməkdir ki, Rusiyada qismən səfərbərlik elan edildikdən
sonra Rusiyadan Gürcüstana daxil olan avtomobillərin sayı 250 ədəd
artıb.
Bundan başqa, həmin dövrdə gecə saatlarında gözləyən avtomobillərin
sayı 50-dən 300-ə qədər artıb.
“Forbes.ru”nun məlumatına görə, son 2 gündə Gürcüstanda mənzilə
tələbat sentyabrın 19-u ilə müqayisədə 8 dəfə artıb.
Nəşrin məlumatına görə, xarici mehmanxanalara da tələbat artıb.
Ostrovok.ru onlayn rezervasiya xidmətinin məlumatına görə,
səfərbərlik günü olan sentyabrın 21-də MDB ölkələrində mehmanxana
axtarışlarının sayı sentyabrın 19-u ilə müqayisədə 5 dəfə,
rezervasiyaların sayı isə 2 dəfə artıb. Gürcüstanla yanaşı,
Qırğızıstan və Qazaxıstanda ruslar sentyabrın 19-na nisbətən 8
dəfə, Ermənistanda isə 14 dəfə çox mənzil axtarırdılar. Serbiyada
mehmanxanalara tələbat 6 dəfə, Türkiyədə isə 3 dəfə artıb.
Sentyabrın 19-u ilə müqayisədə sentyabrın 21-nə real
rezervasiyaların (alışların) sayı da Qırğızıstanda 5 dəfə,
Qazaxıstanda 3,5 dəfə, Ermənistanda 3 dəfə, Özbəkistanda 2 dəfə
artıb.