Marneuli şəhərinin Rustaveli küçəsində yerləşən D. Mağalaşvili adına körpünün bərpası işlərinə başlanılıb. Bərpa işləri çərçivəsində avtomobillərin hərəkəti məhdudlaşdırılmayacaq. Belə ki, körpüdə bərpa işləri mərhələli şəkildə aparılacaq və işlərin həyata keçirilməsi zaman körpüdən istifadə etmək mümkün olacaq.

Körpünün bərpasını tenderdə qalib gələn “İrlani” MMC şirkəti 1 878 333 lariyə həyata keçirəcək. Vəsaitin 95%-i dövlət, 5% isə yerli büdcədən maliyyələşdirilir. Layihəyə görə, körpünün və körpü altındakı infrastrukturun qaydaya salınması planlaşdırılıb.

“Mövcud işıq dirəklərinin və məhəccərlərin sökülməsi, körpünün yolun hərəkət hissəsindən dəfələrlə tökülən asfalt-beton qatının sökülməsi nəzərdə tutulub. Səkilərə mozaikalı daşların quraşdırılması, mövcud, sıradan çıxmış səki bloklarının sökülməsi. Dəmir məhəccərlərin konstruksiyası fərdidir və dəmir kvadrat borulardan ibarətdir. Həmin borular səki bloklarına quraşdırılmış xüsusi nasoslarda betonlanmış polad detallar üzərinə bərkidilir. Layihədə dəmir məhəccərlərin boyanması nəzərdə tutulub. Estakadada drenaj sisteminin quraşdırılması da nəzərdə tutulub. Layihəyə əsasən, körpünün altındakı infrastrukturun quraşdırılması, konkret olaraq yolun 4,50 metrə qədər genişləndirilməsi nəzərdə tutulur. Həmin yolun bir tərəfində piyadalar üçün səki var və qeyd olunanlardan əlavə layihə ilə dəmiryolu keçidində piyadalar üçün xüsusi daşlar quraşdırılacaq”, – tender sənədlərinə yazılıb.

Layihəyə görə, tenderdə qalib gələn şirkət müqavilə bağlandıqdan sonra 5 ay ərzində işləri yerinə yetirməlidir.