BMT Baş Assambleyasının Nyu-Yorkda keçirilən 77-ci sessiyası çərçivəsində Gürcüstan və 63 ölkənin təşəbbüskarı olduğu qətnamə qəbul edilib.

Bu barədə Gürcüstanın Xarici İşlər Nazirliyindən (XİN) bildirilib.

“Gürcüstanın Abxaziya və Tsxinval bölgəsi/Cənubi Osetiyadan olan məcburi köçkün və qaçqınların statusu barədə” qətnamənin lehinə ilk dəfə olaraq 100 ölkə səs verib. Doqquz ölkə sənədi dəstəkləməyib, 59 ölkə isə səsvermədən imtina edib.

Azərbaycan və Türkiyə əvvəlki illərdə olduğu kimi Gürcüstanın təqdim etdiyi qətnaməni dəstəkləyib. Ermənistan isə ənənəsinə sadiq qalaraq səsvermədə iştirak etməyib.

Gürcüstanın xarici işlər naziri İlya Darçiaşvili ölkənin suverenliyi və ərazi bütövlüyünün dəstəklənməsinə görə beynəlxalq ictimaiyyətə təşəkkür edib.

Qeyd edək ki, Gürcüstan adıçəkilən qətnaməni BMT Baş Assambleyasına 2008-ci ildən təqdim edir. Sənəddə Gürcüstanın Rusiyanın işğal etdiyi bölgələrində baş verən zorakı demoqrafik dəyişikliklər qınanılır, etnik mənsubiyyətindən asılı olmayaraq məcburi köçkünlərin öz evlərinə təhlükəsiz qayıtması hüququ təsdiqlənir və onların hüquqlarına hörmətlə yanaşılmanın və qorunmasının zəruriliyi vurğulanır. Azərbaycan 2008-ci ildən etibarən həmin qətnamənin lehinə səs verir.