Tbilisi Nəqliyyat Şirkəti avtobus sürücüsü vəzifəsinə 400 vakansiya elan edir. Bu barədə paytaxt meri Kaxa Kaladze bələdiyyə hökumətinin bu gün, sentyabrın 27-də keçirilən iclasında məlumat verib.

Kaladzenin sözlərinə görə, 8, 10 və 12 metrlik avtobusların sürücülərinin boş qalan yerləri doldurulacaq və hazırda işləyən sürücülər 18 metrlik avtobuslara keçəcəklər.

“Biz artıq istehsal prosesində olan 160 ədəd 18 metrlik avtobus almışıq. Onlar 2024-cü ildə müxtəlif marşrutlarda təqdim olunacaq və istifadəyə veriləcək. Bunu nəzərə alaraq, Tbilisi Nəqliyyat Şirkəti sözügedən avtobusları idarə etmək üçün tələb olunan E kateqoriyalı vəsiqəni almaq üçün hazırda şirkətdə çalışan sürücülərin yenidən hazırlanmasına başlayıb. Onların əvəzinə 8, 10 və 12 metrlik avtobusların sürücülərinin boş yerlərini doldurmaq lazım gələcək”, - deyə Kaxa Kaladze bildirib.

Kaxa Kaladzenin sözlərinə görə, sözügedən vakansiya üçün rəsmi maaş 2500-3000 lari təşkil edir:

“İş tapmaq istəyənlər Tbilisi Nəqliyyat Şirkətinə müraciət etsinlər. Müvafiq müsahibə və təcrübə keçdikdən sonra cinsindən asılı olmayaraq bütün insanlar M3 kateqoriyalı avtobus sürücüsü kimi işə qəbul olunmaq imkanı əldə edəcəklər. 400 sürücü üçün vakansiya elan edilir. Paytaxt meri bildirib ki, bu vakansiya üçün rəsmi maaş 2500-3000 lari təşkil edir.