Lilo qəsəbəsində 21 yaşlı qızın qətlə yetirilməsi ilə bağlı yeni təfərrüatlar bəlli olub.

Əldə olan məlumata görə, qızın meyiti səhər saatlarında evinin qarşısındakı çuxurdan tapılıb.

Qətlə yetirilən şəxsin qohumunun İnterpressnews-la söhbətində bildirdiyinə görə, qıza gecə gec saatlarında zəng edildiyi, bundan sonra evdən çıxdığı bildirilir. Ailənin qohumunun sözlərinə görə, Keti Cavaxişvili gecə saat 01:30-da evdə olub.

O, kəsici-deşici alətlə öldürülüb, lakin ailənin qohumunun sözlərinə görə, sözügedən əşyanın bıçaq olub-olmadığı müəyyən edilməyib.

Mövcud məlumata görə, hüquq-mühafizə orqanları cinayəti törədən şəxsin kimliyini artıq müəyyən edib və onun tutulması istiqamətində əməliyyat-axtarış tədbirləri davam etdirilir.

“Evin qarşısında emalatxana var, emalatxanada işləyən adam onu oradakı kiçik çuxurda tapıb, sonra atasına zəng edib, atası tanıyıb. Həbs edilən yoxdur, axtarırlar, hələ heç nə bilmirik. Yəqin ki, tapacaqlar, kim zəng edib, kim yazıb. Bu qız hava limanının yaxınlığındakı hansısa müəssisədə işləyirdi", - qohumu bildirib.

Hadisə yerində araşdırmalar aparılır.

Daxili İşlər Nazirliyindən “İnterpress News”a verilən məlumata görə, istintaq Cinayət Məcəlləsinin 108-ci, yəni qəsdən adam öldürmə maddəsi ilə aparılır.