“Gürcü Arzusu”nun fəxri sədri Bidzina İvanişvili Qoridə çıxışı zamanı hakim partiyanın 2024-cü il parlament seçkilərində konstitusiya çoxluğunu əldə etməli olmasının 4 səbəbini sadalayıb.

Birinci səbəb kimi o, “Milli Hərəkat” və “onun peyk varisi partiyaları”nın konstitusiyaya zidd elan ediləcəyini bildirib. O, 2008-ci il Rusiya-Gürcüstan müharibəsini o vaxtkı hökumətin ölkəyə xəyanəti adlandırıb və “tarixi rayonların işğalını, on minlərlə insanın öz vətənlərində qaçqın düşdüyünü, yüzlərlə gürcüsünün qurban getdiyini” bəyan edib.

“Bu insanlar ölkəyə və xalqa qarşı törətdikləri bütün ən ağır cinayətlərə, xüsusən 2008-ci ildə törətdikləri ən ağır vətənə xəyanətə görə ən sərt şəkildə mühakimə olunmalıdırlar”, - Bidzina İvanişvili bildirib.

O, həmçinin əlavə edib: “Oktyabrın 26-da keçiriləcək seçkilər bitən kimi, müharibənin qızışdıranları mühakimə olunacaq, ən azı bütün cinayətkarlar gürcü-osetin qardaşlığının və birgəyaşayışının məhvinə görə ən sərt hüquqi cavab alacaqları zaman biz 2008-ci ildə Milli Hərəkatın “Osetin bacı və qardaşlarımızı alovlara bürüdüyünə” görə, üzr istəməyə özümüzdə mütləq güc tapacağıq.

İkinci səbəb kimi o, “Gürcü arzusu”nun seçicilərə qəbul edəcəyini vəd etdiyi “Ailə dəyərləri və yetkinlik yaşına çatmayanların müdafiəsi haqqında” konstitusiya qanun layihəsini adlandırıb. “Gürcü kişisinin əxlaqı bu gün müxalifətin və onun havadarlarının xüsusi hədəfidir. Onlar dəqiq bilirlər ki, cəmiyyət öz keçmişindən, tarixindən, dəyərlərindən əl çəkəndə itaətkar olur!” – deyə Bidzina İvanişvili əlavə edib ki, “ölkə əhalisinin böyük hissəsinin arzusu” konstitusiyada öz əksini tapıb.

Bidzina İvanişvilinin sözlərinə görə, üçüncü səbəb pravoslavlığın “Gürcüstan dövlətinin kimliyinin sütunu elan edildiyi” konstitusiya qanunudur.

Dördüncü səbəb kimi o, ərazi bütövlüyünün bərpa edilməsinin zəruriliyini bəyan edib ki, “hər an dinc yolla bərpa etmək üçün zəmin yetişə bilər”. Bu məsələ ilə bağlı çıxış edən Bidzina İvanişvili qeyd edib ki, “Orada yaşayan insanlar olmadan heç bir torpağın dəyəri yoxdur. Bizim əsas vəzifəmiz osetin bacı və qardaşlarımızın geri qayıtmasıdır. Əsas ideya Gürcüstanın bütövlüyü üzərində əsrlər boyu qaynayan münasibətləri bərpa etməkdir.”