“Era Teatrı” yeni tamaşanın premyerasına hazırlaşır. “Zoopark Əhvalatı” adlı tamaşanın premyerası 7 noyabr və 11 noyabr tarixlərində saat 19:00-da Tbilisidə, Kamera Teatrının səhnəsində baş tutacaq. Tamaşanın quruluşçu rejissoru və pyesin tərcüməçisi Anar Rafiqoğludur. O, “Marneuli” radiosu ilə söhbəti zamanı tamaşanın psixoloji dram janrında olduğunu bildirdi.

“Hazırladığımız “Zoopark Əhvalatı” 1958-ci ildə yazılmış və bir çox ölkələrdə səhnələşdirilmiş,

olduqca məşhur bir əsərdir. Əsərdə insan tənhalığı və müxtəlif sosial təbəqələrin münasibətləri gərgin psixoloji dialoqlarla təsvir olunub. Xüsusi bir səbəb olmadan xarici yazarların əsərlərinə tez-tez müraciət edirik. Əgər əsər dəyərlidirsə və bizim imkanlarımıza uyğundursa, onu hazırlaya bilərik. Gələcəkdə də xarici yazarlara müraciət etmək planımız var. Əsərin süjeti bir-birini tanımayan iki yad adam – Piter və Cerri arasında parkda baş verən təsadüfi qarşılaşma ətrafında qurulub. Bu qarşılaşma tədricən gərgin dialoqa çevrilir və onların həyatları, düşüncələri arasındakı ziddiyyətlər ortaya çıxır. Tamaşa insanın yalnızlıq, əlaqə qurmaq ehtiyacı və daxili boşluq kimi dərin mövzuları üzə çıxarır.”

Tamaşanın rejissorunun sözlərinə görə, tamaşa Azərbaycan dilində ilk dəfə səhnələşdirilir. O, bildirdi ki, gələcəkdə də yeni tamaşaların hazırlanması üçün çalışacaqlar.

“Yalnız bizim teatr tərəfindən deyil, ümumiyyətlə Azərbaycan dilində bu əsəri səhnələşdirən ilk teatr bizik. Əsər Gürcüstanda və Azərbaycanda indiyə qədər səhnəyə qoyulmayıb. Əsərin müəllifi amerikalı məşhur dramaturq Edvard Albidir. Onun əsərləri çox vaxt sosial problemləri və insan münasibətlərini araşdırır. Tamaşada baş rolları İdris Elnuroğlu və Elnur Vəlizadə ifa edirlər. Hər iki aktyorun təcrübəsi tamaşaya xüsusi rəng qatır və obrazların dərinliyini güclü şəkildə canlandırırlar.”

Rafiqoğlunun dediyinə görə, tamaşanı qısa müddətdə hazırlayıblar. Onun sözlərinə görə, onlara əsas dəstək tamaşaçıların alqışıdır.

“Qısa müddətdə tamaşaçılar üçün yeni tamaşalar ərsəyə gətirməyi bacardıq. Bu tamaşadan sonra da yeni layihələrimiz davam edəcək. Əsas gözləntimiz tamaşaçılarımızın dəstəyidir; hər kəs ən azından bir bilet alarsa, bu, bizim gələcək fəaliyyətimiz üçün çox böyük stimul olar. Son olaraq, bu tamaşamızın ərsəyə gəlməsində dəstək göstərən Qafqaz Universitetinə və Gürcüstan Müsəlmanları İdarəsinin şeyxi cənab Faiq Nəbiyevə təşəkkürümüzü bildiririk.”

Tamaşanın quruluşçu rejissorunun sözlərinə görə, əgər dəstək olsa, tamaşanı regionlarda da nümayiş etdirə bilərlər.

“Hər zaman regionlarda tamaşalar nümayiş etdirmək istəyirik. Lakin bunun üçün əlavə dəstək tələb olunur. Əgər belə bir təklif və ya dəstək olarsa, xüsusilə Kvemo Kartlinin müxtəlif bölgələrinə qastrol səfərləri etməyi planlaya bilərik.”

Anar Rafiqoğlunun dediyinə görə, biletlər artıq satışdadır və qurtarmaq üzrədir.

“Biletləri heç bir məntəqəyə getmədən onlayn olaraq elektron formada əldə etmək mümkündür. Bunun üçün 557 31 35 01 nömrəsinə "WhatsApp" vasitəsilə yazmaq kifayətdir. Həmçinin “Era Teatrı”nın rəsmi səhifəsinə müraciət edə bilərsiniz.”

Qeyd edək ki, “Era Teatrı”nın son tamaşası 2024-cü ilin 26 sentyabrında baş tutub. Həmin tamaşa “Komando” adlı tamaşa idi. Tamaşanın əsas süjet xətti 44 günlük İkinci Qarabağ Müharibəsindən bəhs edirdi. Tamaşada baş rolları gənc aktyorlar Elnur Vəlizadə, Elvir Həsənoğlu, Gül Cəfərova və Əli İlqaroğlu ifa edirdilər. Tamaşanın quruluşçu rejissoru və müəllifi isə Anar Rafiqoğludur.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---