“Milli Hərəkat”ın sədri Tina Bokuçava deyir ki, MSK “Smartmatic” markalı markerlər əvəzinə başqa markerlərdən istifadə edib.

Onun sözlərinə görə, səsvermə günü bülletenin digər tərəfində marker işarəsinin görünməsi də məhz bu səbəbdən olub.

Bokuçava hazırda davam edən məhkəmədə müvafiq sübutları təqdim edəcəyini bildirib.

“Milli Hərəkat bütün xülasə protokollarının etibarsız olmasını tələb edir. Müvafiq olaraq, 26

oktyabr seçkilərinin nəticələri tamamilə etibarsızdır. Bütün sahələrdə üç konstitusiya prinsipi pozulub: məxfilik, iradə azadlığı və universallıq.
Bununla yanaşı, biz çox mühüm dəlillər təqdim edirik. Onların arasında MSK-nın tam qanunsuz olaraq və müqavilə şərtlərini pozaraq bir gün əvvəl “Smartmatic” markalı markerlərini digər sübutlarla birlikdə məhkəməyə sübut kimi təqdim edəcəyimiz marka olmayan markerlərlə əvəz etməsi faktı da var. Bu işarələr konstitusiya məxfilik prinsiplərinin və müvafiq olaraq, azad iradənin ifadəsinin pozulduğu izlər qoyub”, - Bokuçava bildirib.

Tbilisi Şəhər Məhkəməsində “Birlik – Milli Hərəkat”, “Güclü Gürcüstan” və Gürcüstan Gənc Hüquqşünaslar Assosiasiyasının iddialarına baxılacaq iclas davam edir. İddialar ayrıca qaldırılmasına baxmayaraq məhkəmə onları birləşdirib. Hakim İveri Abaşidze hər üç işə birlikdə baxacaq.

MSK-nın məlumatına görə, markerlərin dəyişdirilməsi ilə bağlı yayılan məlumatlar yalandır və ictimaiyyəti çaşdırmaq məqsədi daşıyır.

“Seçki bülletenində seçimləri qeyd etmək üçün istifadə olunan xüsusi markerlər “Smartmatic” şirkəti tərəfindən seçki administrasiyasına təqdim edilib. Bu, şirkətlə bağlanmış müqavilə və onların arasında açıq olan və dövlət satınalmalarının elektron sistemində yerləşdirilən markerlərin qəbulu və təhvil-təslim aktları ilə təsdiqlənir”, - deyə Mərkəzi Seçki Komissiyası bildirir.