Tbilisi Şəhər Məhkəməsi "Vahid Milli Hərəkat," "Güclü Gürcüstan" və "Gürcüstan Gənc Hüquqşünaslar Assosiasiyası"nın (GGHA) Dairə Seçki Komissiyaları tərəfindən tərtib olunan yekun protokolların və nəticələrin etibarsız sayılması tələbi ilə verdiyi iddiaları təmin etməyib.

Müxalifət və GGHA tərəfindən verilmiş iddialar ayrı-ayrı hakimlər tərəfindən araşdırılmalı idi, lakin bu iddialar birləşdirilib.

Tərəflər məhkəmə iclasında bildirirdilər ki, 26 oktyabr parlament seçkilərində səsvermənin gizliliyinin pozulduğunu sübut edən çoxsaylı foto və video dəlillər mövcuddur. Müxalifət dəlillərin yenidən araşdırılmasını tələb edirdi və məhkəmədən Mərkəzi Seçki Komissiyasına səs sayma cihazı, bülletenlər və seçicilərin həmin gün istifadə etdiyi markerlərin məhkəməyə təqdim olunmasını tapşırmasını istəyirdi.

Tamar Kordzaia bildirdi ki, "Smartmatic" ilə bağlanmış müqaviləyə əsasən, seçki günü "Smartmatic"in markerlərindən istifadə olunmalı idi, lakin həmin gün başqa marker təqdim edilib.

Onlar həmçinin Dairə Seçki Komissiyalarının üzvlərinin və səsvermə cihazları haqqında rəy hazırlayan audit ekspertinin dindirilməsini tələb edirdilər. Tamar Kordzaianın sözlərinə görə, ümumilikdə işdə ən azı 56 şahid var idi.

"Gürcüstan Gənc Hüquqşünaslar Assosiasiyası"nın hüquqşünası Nino Xutsişvili isə bildirdi ki, GGHA-nın iddiası Dairə Seçki Komissiyalarının yekun protokollarının ləğvi və Mərkəzi Seçki Komissiyasının bu protokolların ləğvi haqqında qərarı rədd etməsi ilə bağlıdır. Şikayətləri seçkilərin keçirilməsi zamanı azad iradənin ifadəsi və gizlilik prinsiplərinin pozulmasına əsaslanır ki, bu prinsiplər konstitusiya ilə qorunur.

Nəticədə, bu günki məhkəmə iclasında tərəflər hakimə 11 vəsatətlə müraciət etsələr də, hakim İveri Abaşidze bütün vəsatətləri əsaslı hesab etməyərək təmin etməyib.