Avropayönlü mitinqlərdə iştirak edən vətəndaşlar Facebook sosial şəbəkəsində yazır ki, naməlum şəxslər mobil telefonları ilə onlara zəng edib hədələyirlər.
Son 11 gün ərzində və ondan əvvəl Tbilisidə aksiyaların təşkilində iştirak edən ən fəal qruplardan biri olan “Saxla”nın təsisçilərindən biri İlia Qlonti yazır ki, ona telefon nömrəsinə təhdidlər barədə zəng gəlib.

"Mənim SİM kartım həyat yoldaşımın

telefonundadır və indi məlum olur ki, ona zəng edib, evə mənim sümüklərimi gətirəcəklərini deyiblər", - Qlonti yazıb.

Aksiyaların fəal iştirakçılarından biri, “Dəyişiklik Koalisiyası”nın üzvü Vano Qomuraşvili söyüşlə və döyülməklə hədələnib.

“Zəng edib soruşdular ki, hardasan, oğlan? Sonra məni təhqir etməyə başladılar və dedilər ki, məni mütləq tapıb döyəcəklər. İkinci nömrədən də mənə zəng etdilər. Oradan da təhqiramiz sözlər gəldi”, - Vano Qomuraşvili AzadlıqRadiosuna bildirib.

Xarici telefon nömrələri “Mtavari”nin jurnalisti Eka Kvesitadzenin telefonuna da zəng edib. O, naməlum şəxslərin telefonlarına cavab verməyib.

Bu, naməlum şəxslərin Avropayönlü mitinq iştirakçılarına zəng edərək hədələmələri birinci dəfə deyil. Bu, 2024-cü ilin mayında da minlərlə insanın küçədə “Agentlər haqqında qanun”un qəbuluna etiraz etdiyi zaman baş vermişdi.

Daha sonra Fərdi Məlumatların Mühafizəsi Xidməti işi araşdırmağa başlayıb və araşdırılması üçün prokurorluğa göndərilib. Prokurorluğun nə tapdığı hələ məlum deyil.

O zaman müxalifət və vətəndaş sektoru bu təhdidlərə görə iqtidarı günahlandırırdı, çünki onlar hesab edirdilər ki, dövlət qurumlarında saxlanılan şəxsi məlumatlar olmasaydı, şəxsi məlumatlar başqa şəxslərin istifadəsinə verilə bilməzdi.