Gürcüstan Daxili İşlər Nazirliyinin məlumatına görə, Mərkəzi Kriminal Polis Departamentinin əməkdaşları Banqkokda İnterpoldan daxil olmuş məktub əsasında insan alveri maddəsi ilə (Cinayət Məcəlləsinin 143-cü maddəsinin 3-cü hissəsi) araşdırmalara başlayıblar.

Söhbət Tayland mətbuatında yayılan, Gürcüstanda insan alveri sxeminin fəaliyyət göstərdiyi məlumatlardan gedir - qurbanlar qanuni surroqat analıq vədi ilə ölkəyə gətirilir və hər ay zorla onlardan yumurta hüceyrəsi əldə olunmasına cəlb edilirdilər.
Xarici KİV-in məlumatına görə, Pavena Uşaq və Qadın Fondu keçirdiyi mətbuat konfransında 100-ə yaxın Taylandlı qadının öz iradəsi əleyhinə bu sxemə cəlb edildiyini bildirib.

Mediada Tayland Kral Polisinin Xarici Əlaqələr Şöbəsinin müdaxiləsindən sonra 3 qadının Taylanda qayıtdığı bildirilir.

“İstintaq başlayan kimi hüquq-mühafizə orqanlarının əməkdaşları tərəfindən bütün zəruri istintaq hərəkətləri, o cümlədən məhkəmə-tibbi ekspertizalar təyin edilməsi və müxtəlif yerlərdə axtarışlar aparılıb. 70-ə yaxın əcnəbi vətəndaşla sorğu keçirilib, lakin onlardan 3 Tailand qadınından başqa heç birinin şikayəti olmayıb. Müsahibə edilən 3 Taylandlı qadın izah etdi ki, onlar artıq surroqat olmaq və yaşadıqları ünvanda qalmaq istəmirlər. Həmin gün hüquq-mühafizə orqanlarının əməkdaşları hər üç qadını insan alveri qurbanlarının sığınacağına təhvil veriblər və müvafiq hüquqi prosedurlar başa çatdıqdan sonra onlar ölkəni tərk ediblər", - DİN-in məlumatında deyilir.

Agentliyin məlumatına görə, polis həmçinin surroqat analıq məqsədilə Gürcüstana Tailand vətəndaşlarını gətirmiş 4 xarici vətəndaşı dindirib və onların mobil telefonlarını sübut kimi götürüb və onlardan məlumat tələb olunub.

Qeyd olunan cinayət işi üzrə istintaq davam etdirilir.