Azərbaycan ABŞ-nin Beynəlxalq İnkişaf Agentliyinin (USAID) ardınca Rusiyanın “Rossotrudniçestvo” agentliyinin fəaliyyətinin dayandırılmasına qərar verib.

Azərbaycan Xarici İşlər Nazirliyinin mətbuat katibi Ayxan Hacızadənin Rusiyanın “Rossotrudniçestvo” agentliyinin Azərbaycan ərazisində fəaliyyətinə xitam verilməsi ilə bağlı yerli mətbuatın sualına cavabda deyib ki, “Rossotrudniçestvo”nun Azərbaycandakı nümayəndəliyi olan Rusiya İnformasiya-Mədəniyyət Mərkəzi - “Rus Evi”nin hüquqi şəxs qismində qeydiyyatının mövcud olmadığı və təşkilatın Azərbaycan qanunvericiliyini ciddi şəkildə pozduğu barədə Rusiya tərəfinə məlumat verildikdən sonra fevralın 3-də “Rus Evi”nin fəaliyyətinə xitam verilməsi barədə Rusiya tərəfinə nota göndərilib.

“Bununla, Azərbaycan tərəfinin ölkəmizdə “Rus Evi”nin fəaliyyətinə xitam verilməsi barədə qərarından irəli gələrək, Rusiya tərəfindən bu istiqamətdə müvafiq tədbirlər həyata keçirilməsi gözlənilir”, o qeyd edib.

Öz növbəsində “Rossotrudniçestvo”nun rəhbəri Yevgeni Primakov “Rossiya-24” telekanalına bildirib ki, Azərbaycan “Rossotrudniçestvo” agentliyinin ölkə ərazisində fəaliyyətinə xitam verilməsi barədə diplomatik kanallar vasitəsilə Rusiyaya rəsmi bildiriş göndərib.

“Orada deyilir ki, bizim nümayəndəliyimiz, xalq arasında "Rus Evi" kimi tanınan Rusiya İnformasiya-Mədəniyyət Mərkəzi yerli qanunvericiliyə əsasən hüquqi şəxs kimi qeydiyyatdan keçməlidir”, Primakov vurğulayıb.

Onun sözlərinə görə, Bakıdakı “Rus Evi” icarəyə götürdüyü binanı ay yarım ərzində tərk etməlidir.

“Çünki sahibi binanı təcili satmaq niyyətində olduğunu açıqlayıb”, Primakov qeyd edib.

Xatırladaq ki, bir neçə gün öncə Azərbaycanın “Baku TV” internet televiziyası “Rus Evi”ni “Azərbaycanda dini və separatçı toxumları səpməyə çalışan şəxslərin, daha doğrusu agentlərin yuvası” kimi təqdim edib. Bundan onra “Rossotrudniçestvo”nun rəhbəri Yevgeni Primakov bu televiziyanı məhkəməyə verməklə hədələyib.

“Rossotrudniçestvo”nun Azərbaycanda nümayəndəliyi (Rus Evi) 3 iyul 1997-ci ildə Azərbaycan ilə Rusiya arasında imzalanmış sazişə uyğun olaraq yaradılıb.

Rəsmi məlumata görə, mərkəz Rusiyanın Azərbaycandakı diplomatik nümayəndəliyinin rəhbərliyi altında fəaliyyət göstərir.

Mərkəzin əsas fəaliyyət istiqamətlərinə rus mədəniyyətinin, elminin və təhsilinin təbliği, rus dilinin möhkəmləndirilməsi, həmvətənlərə dəstək, gənclərin layihələri, beynəlxalq inkişafa yardım, tarixi və xatirə tədbirləri daxildir. Mərkəz həmçinin Rusiya Hökumətinin kvotasına əsasən xarici vətəndaşlar üçün Rusiya ali məktəblərinə qəbul müsabiqəsinin birinci mərhələsinin həyata keçirilməsinə cavabdehdir.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---