Rusiya ilə uğurlu məhbus mübadiləsindən sonra ABŞ Prezidenti Donald Tramp çərşənbə günü Ukrayna münaqişəsinə son qoymaq üçün çoxtərəfli diplomatik həmləyə başlayıb. O deyib ki, yaxında Rusiya lideri ilə görüşəcək və cümə günü Ukrayna lideri ilə görüşmək üçün vitse-prezidentin başçılıq etdiyi komanda göndərəcək.

Prezident Donald Tramp Rusiyanın təxminən üç ildir davam edən hərbi müdaxiləsinə son qoymaq məqsədi ilə diplomatik həmlə etdiyi bir vaxtda, ABŞ-ın Ukraynaya dəstəyini davam etdirməsi üçün şərtlərini irəli sürüb.

“Beləliklə, biz pulumuz qarşılığında zəmanət alırıq. Biz pulumuz qarşılığında – onların nadir torpaqları, nefti və qazı və başqa çox şeyləri var ki, onları zəmanət olaraq alacağıq. Və biz pulumuza zəmanət istəyirik…… Onlar buna razılaşıb. Ukrayna buna razılaşıb. (Jurnalist: Artıq Ukraynaya yardım göndərmirsiniz?) Yox, Göndəririk. Amma onun qarşılığında zəmanət istəyirik və bu pul qarşılığında zəmanət veriləcək,” - o deyib.

Çərşənbə günü Konqresə təqdim edilən yeni hesabata əsasən, ABŞ qanunvericiləri 2022-ci ilin fevralından bəri Ukraynaya təxminən 183 milyard dollar dəyərində hərbi və qeyri-hərbi yardımı təsdiqləyiblər. 40 milyard dollardan bir qədər az vəsait hələ də qalır.

Trampın şərhləri onun rusiyalı və ukraynalı həmkarları ilə telefon danışıqları aparmasından sonraya təsadüf edib. Ukrayna Prezidenti Volodimir Zelenski Trampla “uzun” söhbətinin olduğunu təsdiqləyib.

Zelenski çərşənbə axşamı potensial iqtisadi sövdələşməni müzakirə etmək üçün ABŞ-ın yeni maliyyə naziri ilə görüşündə Ukraynanın sülh planındakı yeganə tələbini vurğulayıb – Ukraynanın NATO-ya üzv olması və təhlükəsizlik zəmanətlərinə ehtiyac.

"Və mən prezident Trampdan istəmişəm ki, bizə bu təhlükəsizlik zəmanətlərini versin, Ukraynaya kömək etsin, bizi gücləndirsin. Əlbəttə ki, biz Avropa ilə danışmalıyıq, çünki bizim daha da böyük ordumuz olmalıdır. İndi bizim büdcə kəsirimiz var, amma daha da böyük, ən azı indiki qədər böyük orduya sahib olmaq, onu qidalandırmaq və silahlandırmaq böyük resurs tələbedir. Bu pul hardansa gəlməlidir. Bunlar təxmini təhlükəsizlik zəmanətləridir,” - Ukrayna Prezidenti Volodimir Zelenski deyib.

Tramp həmçinin deyib ki, o, “çox uzaq olmayan gələcəkdə” Səudiyyə Ərəbistanında Rusiya Prezidenti Vladimir Putinlə görüşəcək.

O, Moskvanın amerikalı müəllim Mark Fogeli kibercinayətkarlıqla məşğul olan Rusiya vətəndaşı ilə dəyişmək qərarının müharibəni bitirmək üçün danışıqlara yaxşı yol açacağına ümid etdiyini bildirib.

Kreml məhbus mübadiləsi ilə bağlı bunu deyib:

"Təbii olaraq, bu cür razılaşmalardan əvvəl çox, çox ciddi danışıqlar aparılır. Və təbii ki, bu cür razılaşmaların dönüş nöqtəsi ola bilmək ehtimalı azdır, lakin eyni zamanda, bunlar indi ən aşağı nöqtədə olan (Rusiya və ABŞ arasında) qarşılıqlı etimadın yavaş-yavaş yaradılması üçün müəyyən addımlardır,” - Dmitri Peskov bildirib.

Fransadan Almaniyaya səfər edən Vitse-prezident JD Vans cümə günü Münhendə Zelenski ilə yüksək səviyyəli danışıqlarda ABŞ-ın nümayəndə heyətinə rəhbərlik edəcək.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---