Kənd həkimlərinin bir hissəsi ailə təbabəti üzrə hazırlıq keçməyib və sertifikatlaşdırılmayıb,

lakin 2015-ci illə müqayisədə vəziyyət yaxşılaşıb. Bu barədə “Kənd həkimi” dövlət proqramının idarə edilməsinin səmərəliliyini qiymətləndirən audit hesabatında qeyd olunub.

Audit hesabatına əsasən, ilkin araşdırma zamanı kənd həkimlərinin cəmi 60%-nin ailə həkimi sertifikatı olduğu müəyyən edilib. Digərləri isə dar ixtisaslı həkimlər idi. 2024-cü ilin birinci rübünə olan məlumata görə, 1282 kənd həkimindən 1038-i (81%) ailə təbabəti üzrə sertifikata malikdir. Lakin analizlər göstərir ki, bu göstərici regionlar arasında fərqlənir.

Audit kəndlərdə kifayət qədər ixtisaslı həkimlərin təmin olunması üçün araşdırma və monitorinq əsasında həkimlərin peşəkar inkişafı üçün minimal tələblərin dəqiq müəyyənləşdirilməsini tövsiyə edir.

Son on ildə kənd həkimlərinin maaşı artırılsa da, hələ də ölkə üzrə orta əməkhaqqı (2004.9 lari) ilə müqayisədə aşağıdır.

2014-cü ildə bir kənd həkiminin aylıq maaşı 650 lari, tibb bacısının isə 455 lari təşkil edirdi. Hazırda bu məbləğ artaraq həkimlər üçün 1262.50 lariyə, tibb bacıları üçün isə 1018.75 lariyə çatıb.

Ümumdünya Səhiyyə Təşkilatının (ÜST) siyasət sənədinə əsasən, kənd səhiyyə işçilərini saxlamaq və birincili tibbi xidmətin əlçatanlığını artırmaq üçün əlavə maliyyə stimulları tələb olunur. Bunun üçün informasiya sistemləri inkişaf etdirilməli və birincili tibbi xidmət müəssisələrində pasiyentlərin məlumatları toplanaraq təhlil edilməlidir.

İlkin audit zamanı tibb işçilərinin maaşı sabit idi və həkimlərin motivasiyasını artırmağa yönəlmirdi. Hazırda Gürcüstanda birincili səhiyyə islahatı aparılır və bu çərçivədə həkimlərin əməkhaqqı sistemi beynəlxalq təcrübəyə uyğunlaşdırılır. İslahatın məqsədi nəticəyə əsaslanan maaş sistemini tətbiq etməkdir.

İslahatın yol xəritəsinə əsasən, nəticəyə əsaslanan maliyyələşdirmə sistemi 2022-ci ildən tədricən həyata keçirilməli idi. 2023-cü ildən kənd həkimləri və tibb bacıları üçün prioritet səhiyyə problemlərinin idarə olunmasına görə əlavə maliyyələşdirmə nəzərdə tutulurdu.

Lakin audit hesabatına görə, bu planlar 2024-cü ilə qədər tam icra olunmayıb.