Ermənistan Parlamenti Avropa İttifaqına (Aİ) üzvlük prosesinin başlanmasını yekun olaraq dəstəklədikdən sonra Moskva bu məsələyə münasibət bildirib.

26 martda Ermənistan Parlamentində (107 yerlik) hakim partiya əksəriyyəti Avropa İttifaqına üzvlüklə bağlı qanun layihəsinin ikinci oxunuşunu dəstəkləyib.

"Ermənistan eyni anda "iki stulda otura" bilməz, ona Avrasiya İqtisadi İttifaqı (Aİİ) və Avropa İttifaqı arasında seçim etmək lazım gələcək", – bunu Rusiya Federasiyası baş nazirinin müavini Aleksey Overçuk jurnalistlərə açıqlamasında bildirib.

Bundan əvvəl Ermənistan Parlamenti ikinci və sonuncu oxunuşda respublikanın Avropa İttifaqına üzvlük prosesinin başlanmasına dair qanun layihəsini qəbul edib.

"Mən qəbul edilmiş qanunun mətnini oxudum. O, elə bir məzmunda yazılıb ki, "bütün yaxşı şeyləri dəstəkləyir və bütün pis şeylərə qarşıdır", yəni tamamilə ümumi ifadələrdən ibarətdir. Bu, Ermənistanın daxili işidir. Lakin biz anlayırıq ki, həm Avrasiya İqtisadi İttifaqı, həm də Avropa İttifaqı müəyyən bir siyasi gündəlik üzrə hərəkət edir. Deməli, ölkənin seçim etməsi lazım gələcək. Çünki eyni anda iki stulda oturmaq mümkün deyil – bu, tamamilə aydındır", – deyə Rusiya hökumət başçısının müavini bildirib.

"Biz görürük ki, Ermənistan Avrasiya İqtisadi İttifaqında aktiv fəaliyyətini davam etdirir", – o əlavə edib.

"Biz, əlbəttə ki, bu prosesləri diqqətlə izləyirik. Anlayırıq ki, əgər Ermənistan Avropaya yönəlirsə, bu, bizim həmin ölkə ilə bütün iqtisadi əlaqələrimizi yenidən nəzərdən keçirməyimizə səbəb olacaq. Təəssüf ki, bu, Ermənistanda insanların yaşayış səviyyəsinə təsir göstərəcək və bu, bizim üçün arzuolunan deyil".