Mzia Amağlobelinin işi üzrə əsas məhkəmə baxışı Batumi Şəhər Məhkəməsində 31 martda davam edəcək.

Bu iclasda vəkillər açılış nitqi ilə çıxış edəcək, prokurorluq isə şahidləri təqdim etməlidir. Hələlik növbəti iclasda kimlərin dindiriləcəyi məlum deyil.

Mzia Amağlobeli qanunsuz həbsdədir. O, etiraz əlaməti olaraq 38 gün aclıq aksiyası keçirib. Onun jurnalist fəaliyyətinə görə cəzalandırıldığı bir neçə faktla sübut olunur. Məsələn, onun həbsinə əsaslanan saxta protokol buna bariz nümunədir.

Mzia Amağlobelinin işinə sanksiyaya məruz qalmış hakim Nino Saxelaşvili baxır. Estoniya onu 2025-ci il martın 3-də məhz Mzia Amağlobelinin işi üzrə insan haqlarını pozduğuna görə sanksiyaya məruz qoyub. Nino Saxelaşvili saxta sənədlərə əsaslanaraq Amağlobeliyə həbs cəzası təyin etdikdən sonra, sınaq müddəti ilə təyin edilmiş hakim olmasına baxmayaraq, daimi hakim statusu aldı. Onun hüquq sahəsində cinayət işlərinə dair ixtisası yoxdur.

Mzia Amağlobelinin işi üzrə hökmü, böyük ehtimalla, hakim Nino Saxelaşvili çıxaracaq.
Ona polis əməkdaşına hücum ittihamı irəli sürülüb. Əgər bu ittiham təsdiqlənərsə, onu 4 ildən 7 ilə qədər həbs cəzası gözləyir.
Lakin iş üzrə əhəmiyyətli sübutların böyük hissəsini hakim Viktor Metreveli işdən çıxarıb. Müdafiə tərəfinin şahid kimi dindirmək istədiyi 17 nəfər, 18 video sübut, 13 baxış protokolu və 14 yazılı sübut məhkəmə prosesindən uzaqlaşdırılıb.

2025-ci il martın 18-də Mzia Amağlobeli inzibati iş üzrə hakim Salix Şainidze tərəfindən 2000 lari məbləğində cərimələnib. Bu iş üzrə hakim Acarıstan Polis Departamentinin rəisi Qriqol Beselia və Batumi Polis İdarəsinin rəisi İrakli Dqebuadzeni dindirməkdən imtina edib. Səbəb kimi isə müdafiə tərəfinin məhkəməyə təqdim etdiyi videolarda hər şeyin açıq-aydın göründüyünü göstərib.

Söhbət elə bir videodan gedir ki, orada Mzia Amağlobelinin birbaşa Acarıstan Polis Departamentinin rəisi Qriqol Beselia tərəfindən saxlanıldığı görünür. Halbuki saxlanma protokoluna əsasən, onu başqa bir polis əməkdaşı – Qoça Vanadze saxlamış kimi göstərilib. Həmçinin bir digər videoda Batumi Polis İdarəsinin rəisi İrakli Dqebuadzenin səsi eşidilir və o, Amağlobelinin İnzibati Məcəllənin 150-ci maddəsinə əsasən saxlanıldığını deyir. Lakin saxta protokolda Amağlobelinin İnzibati Məcəllənin 173-cü maddəsinə əsasən saxlanıldığı və polis əməkdaşlarını təhqir etdiyi yazılıb.
Bütün bu saxtakarlıqlara baxmayaraq, hakim Salix Şainidze Mzia Amağlobelini hüquq pozucusu kimi tanıyıb. Amağlobelinin vəkilləri hələ də hakimin qərarını rəsmi şəkildə almayıblar, lakin onlar bu qərarı apelyasiya qaydasında mübahisələndirmək niyyətindədirlər.

Bundan əlavə, Mzia Amağlobelinin vəkilləri bu işi Avropa İnsan Haqları Məhkəməsinə çıxarmağı planlaşdırırlar.