ICR Qrupunun Müşahidə Şurasının sədri, iş adamı Kaxa Xazaradzenin qiymətləndirməsinə görə, 2025-ci ilin birinci rübü pərakəndə ticarət üçün olduqca çətin keçib və o, hesab edir ki, ikinci rüb daha da ağır olacaq.

Kaxa Xazaradze BMGTV-nin "Nöqtədə" verilişində bildirib ki, yanvar-mart aylarında ICR Qrupuna daxil olan mağazalarda planlaşdırılandan 10% az satış qeydə alınıb.

“ICR Qrupu” Gürcüstanda pərakəndə ticarət sahəsində ən böyük qruplardan biridir. Şirkət 1993-cü ildə Gürcüstan bazarında fəaliyyətə başlayıb və hazırda təxminən 1000 işçisi var. “ICR Qrupu” beynəlxalq ayaqqabı, geyim, aksesuar, mebel brendləri və qida obyektlərini təmsil edir.

"Mağazalarda alıcı axınını qeydə alırıq, bu isə xeyli azalıb", – deyə iş adamı bildirib və vurğulayıb ki, yaxın aylarda vəziyyətin yaxşılaşacağını gözləmir.

"Təmsil etdiyimiz sahədə birinci rüb kifayət qədər çətin oldu. Birinci rüb daha çox endirim mövsümüdür və daha çox qiymət endirimi etməyə məcbur olduq, amma buna baxmayaraq, planlaşdırılandan 10% az satış əldə etdik. Aprel də çətin başladı – düşünürəm ki, ikinci rüb satışlar baxımından daha da çətin olacaq", – deyə Kaxa Xazaradze bildirib və əlavə edib ki, bu gün biznes üçün lari məzənnəsinin dalğalanmasından daha böyük problem əhalinin alıcılıq qabiliyyətinin azalmasıdır.
“İnflyasiya artır, əhalinin isə gəliri azalır; biz də mağazalara alıcı axınının xeyli azaldığını qeydə alırıq”, – deyə iş adamı qeyd edib.

Turistlərin Gürcüstanın ticarət sektorundakı payına gəlincə, ICR Qrupunun Müşahidə Şurasının sədri "Nöqtə" verilişinə müsahibəsində bildirib ki, “turist səbəti də dəyişib”.

"Ölkəyə daha az büdcəli turistlər gəlir; ola bilər ki, say baxımından əvvəlkindən də çoxdurlar, amma daha az xərcləyirlər. Əgər əvvəllər Gürcüstan Avropa və inkişaf etmiş ölkələrdən gələn turistlər üçün maraqlı idisə, indi onların böyük hissəsini postsovet və Asiya ölkələri əvəz edib – bunda pis bir şey görmürəm. Amma biz kiçik ölkəyik və seçimimizi keyfiyyətli turizmdən yana etməliyik, kütləvi turizmdən yox – çünki nəticədə, bu, yalnız trafik gətirir, böyük gəlir yox", – deyə Kaxa Xazaradze vurğulayıb.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---