Bu gün, 25 aprel tarixində “Gürcü Arzusu” partiyasının sədri vəzifəsindən getdiyini və ümumiyyətlə siyasətdən ayrıldığını açıqlayan İrakli Qaribaşviliyə brifinq zamanı belə bir sual verildi:

Gələcəkdə siyasətə müxalifətçi kimi qayıtmaq ehtimalı varmı?
Qaribaşvili cavab verdi:

“Kiminlə qarşı-qarşıya gəlməliyəm ki?!”

O, bundan əvvəl dəfələrlə Bidzina İvanişviliyə təşəkkür etmiş və onu tərifləmişdi.

Qaribaşvilinin sözlərinə görə, onun guya müxalifətə keçəcəyi haqda yayılan söz-söhbətlər tamamilə əsassız spekulyasiyadır. Xatırladıb ki, Bidzina İvanişvili özü də keçmişdə demişdi ki, öz hökuməti üçün müxalifəti özü yaratmaq istəyir. Bu səbəbdən də bəzi şayiələr dolaşır ki, bu “saxta müxalifət” partiyasının lideri Qaribaşvili ola bilərdi.

Amma Qaribaşvili bildirib ki, hazırda onun əsas motivasiyası siyasətdən getmək, ailəsinə daha çox vaxt ayırmaqdır və əlavə edib:

“Qalanını həyat göstərəcək.”
Keçmiş Baş nazirin sözlərinə görə, hələ dəqiq bilmir ki, gələcəkdə harada çalışacaq, lakin bu, özəl sektor – yəni biznes sahəsi olacaq.

Sual verilib ki, gələcəkdə siyasətə qayıdacağını istisna edirmi?

Qaribaşvili cavab verib:

“Həyatda heç nəyi istisna etmək olmaz, amma bu anda siyasətə qayıtmaq nə arzumdur, nə də planlarımda var.”

Xatırladaq ki, İrakli Qaribaşvili siyasətə Bidzina İvanişvili ilə birlikdə gəlmişdi. O, əvvəlcə daxili işlər naziri, sonra isə baş nazir olmuşdu. 2015-ci ildə siyasətdən getmiş, lakin 2019-cu ildə müdafiə naziri olaraq qayıtmış, sonra isə yenidən baş nazir postuna gətirilmişdi.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---